Idman.biz
"Fernandu Santuşun gedişindən sonra biz hələ 3 oyun oynamışıq. Birdən-birə qlobal dəyişikliyin olması çətindir".
Bunu Azərbaycan milli komandasının və "Qarabağ"ın hücumçusu Musa Qurbanlı sportal.az-a müsahibəsində deyib.
Həmin müsahibəni təqdim edirik:
- Ukrayna ilə matçda mübarizə apardınız, amma sonda məğlubiyyət qeydə alındı. Həmin görüş sizin üçün necə yadda qaldı?
- Bəli, yaxşı mübarizə apardıq. İstəyərdik ki, qələbə, ən azından xal qazanaq. Oyundan qabaq da bunun üçün hazırlaşmışdıq. Ayxan Abbasovun da komanda ilə bu yöndə söhbəti olmuşdu. İnanmışdıq, çalışmışdıq. Vuruşduq da. Oyunun gedişatı da onu göstərirdi ki, bacara bilərik. Lakin belə alındı. Buna görə təəssüflənirik. Xal qazanmaq istəyərdik. Ən azından inanırıq, vuruşuruq. Məncə, bunun özü də müsbətdir. Öz əzmkarlığımıza inanmağa başlamışıq və bu da hardasa faydamıza olacaq, get-gedə daha da inkişaf edərik.
- Fernandu Santuşun gedişindən sonra çox şey dəyişdiyi deyilir. Bəs, dəyişməyən nədir ki, hələ də qələbə qazanmağınıza mane olur…
- Fernandu Santuşun gedişindən sonra biz hələ 3 oyun oynamışıq. Birdən-birə qlobal dəyişikliyin olması çətindir. Ümumiyyətlə, qlobal dəyişikliyin olması çətindir. Nə qədər əzmkar olsan, vuruşsan da, öz oyununu tam oturtmaq üçün müəyyən vaxt lazımdır. Ustalığımızı da artırmalıyıq. Yalnız döyüşmək və əzmkarlıqla nəsə alınmır, ustalığımızı da artırmalıyıq. Son oyunlardakı bəzi hissələr var idi, rəqibdən üstün olduq, göründü ki, komanda şəklində hücum potensialımız da var. Sadəcə bunun üzərində işləməliyik. Ayxan Abbasov da necə işləmək lazım olduğunu bilir. Biz də ustalığımızı da artırsaq, yəqin ki, qələbələr qazana bilərik.
- Ukrayna millisi ilə oyundan əvvəl keçirilmiş mətbuat konfransında həm Elvin Cəfərquliyev, həm də Ayxan Abbasov qrupdan çıxmaq iddiası haqda danışdı. Həqiqətən buna inanırdınız?
- Əlbəttə. Buna görə də sırf onu vurğuladım. Ən azından öz döyüşkənliyimizə, əzmkarlığımıza inanmağa başlamışıq. Nələrsə bacara biləcəyimizə inanırıq. Oyunumuz da bundan tutmağa imkan verir. Bizə lazım olan bu idi. Çünki inanmadan oyuna çıxmağın heç bir faydası yoxdur. Ukrayna ilə matçda qalib gəlsəydik, Fransadan başqa, hamının 4 xalı olacaqdı. Hardasa şansımız olacaqdı. Ayxan Abbasov hətta bu şans üçün döyüşməyə dəydiyinə inandırırdı. Biz də inanırdıq. Bundan sonra da inanmağa davam edəcəyik. Ən azından yaxşı nəticələr üçün çıxacağıq.
- Ayxan Abbasov, futbol ictimaiyyəti, hamı bildirir ki, futbolçularımız xaricə yollanmalıdır, legioner həyatı yaşamalıdır. Səncə, bir ildən sonra 4 yox, millidə legioner həyatı yaşayan 8 futbolçumuz olacaq?
- Ümumiyyətlə, oynamaq hər bir futbolçu üçün çox vacibdir. Hər birimiz istəyirik ki, daha çox oynayaq. Çünki nə qədər məşq etsən də, oynamayasan, o effekti almırsan. Ona görə də, hər birimiz ayrı-ayrılıqda ilk növbədə oynamağımız, ikinci növbədə yaxşı səviyyədə oynamağımız bizim üçün çox vacibdir. Biz də istəyirik, buna can atırıq. Hazırda "Qarabağ"ın hansı səviyyədə oynadığını görürsüz. Hansısa futbolçu az oynayır, hansısa futbolçu çox oynayır. Bizim üçün bu dəqiqə əsas olan komandadır, "Qarabağ"ın xeyrini fikirləşməliyik. Millidə oynayan azərbaycanlıların hər biri öz uşaqlarımızdır, nə qədər çox oynasaq, milliyə nə qədər çox fayda verə bilsək, o qədər yaxşıdır. Bizim də niyyətimiz odur ki, daha çox oynayaq, daha yuxarı səviyyəli klublarda, liqalarda çıxış edək. Bu da millimizə xeyir verməyimizə kömək olsun.
- Milli komanda son iki oyunda uduzsa da, sanki sizə olan inam artıb. Növbəti iki görüş İslandiya və Fransaya qarşıdır. Səncə, bu görüşlərdə xal qazanmaq mümkündür?
- Əlbəttə. Özümüz də, inanırıq və bunun üçün vuruşacağıq. Nələrisə müsbətə doğru dəyişmişik. Amma indi deyək ki, biz çıxıb qalib gələcəyik... Biz həqiqətən inanırıq. Sadəcə özümüzü itirməməliyik. Eyni qaydada, üzərinə də bir qədər qoyaraq, işimizə davam etməliyik. Belə olacağı təqdirdə, qələbə qazana bilərik.
- "Qarabağ" Avropada bu mövsüm çoxlarını təəcccübləndirib. Çempionlar Liqasında 3-cü turda "Atletik"lə qarşılaşacaqsınız. Bilbao səfərində uğurlu nəticə ola bilər?
- İki oyun bundan əvvəl, qrup matçları başlamamışdan qabaq soruşsaydınız, bəlkə də heç birimiz inanmazdıq ki, iki turdan sonra altı xalımız olacaq. Ona inanmağa başlamışıq ki, futbolda hər şey mümkündür. Oyunumuza da bələdik. Gördük ki, bu səviyyədə də öz oyunumuzu göstərə bilirik. Hansı oyun olursa-olsun, qələbə üçün oynayacağıq. Düzdür, rəqiblərimiz yüksək səviyyəlidir, rəqiblərə layiq olduğu dəyəri veririk. Amma özümüzə də, layiq olduğumuz dəyəri verməliyik. "Atletik"lə oyuna hələ var, hazırlaşacağıq. Məşqçilər korpusu analiz edəcək, məlumatlar verəcək. "Atletik" haqda detallı məlumatım yoxdur. Ümumən, necə böyük komanda olduqlarını bilirəm. Bu matçda da baş məşqçi və məşqçilər heyəti lazım olan təlimatları verəcək. Hər şey mümkündür, əlimizdən gələni edəcəyik.
