Sport24.az
"Qarabağ"ın futbolçusu Musa Qurbanlının Sport24.az-a müsahibə verib.
- Premyer Liqanın XXIV turunda Sabah"la görüşdə 1:1 hesablı heç-heçə etdiniz. Matçla bağlı fikrin necədir?
- Qalib gəlmək istəyirdik. Nələrsə çatışmadı. İkinci hissədə daha yaxşı oynadıq. Rəqibi tamamilə müdafiəyə otuzdurmuşduq. Amma nələrsə çatışmadı. Bəzən son toxunuşlar...Bəzən ani diqqətsizlik qol buraxmağımıza səbəb oldu. Qələbə qazanmağı çox istəyirdik. Alınmadı. Bir xalla kifayətləndik. Qarşıdakı matçlara köklənəcəyik.
- Son vaxtlarda start heyətində şans qazanmırsan. Bunu ən çox nə ilə əlaqələndirərdin?
- Baş məşqçinin qərarıdır, necə məsləhət görürsə, elədir. Mən ancaq üzərimə düşən vəzifə ilə maraqlanıram. Hər məşq maksimum çalışıram, əlimdən gələni edirəm. Allah qoysa, şans düşər, biz də oynayarıq.
- Yeni mövsümdə legioner limitinin ləğvini də nəzərə alsaq, fikrin nədir, komandada qalmaq istəyirsən, yoxsa daha çox oynaya biləcəyin komandaya getmək istəyirsən?
- İnanırsız, vallah hələ heç nə bilmirəm. İndi heç nə haqda düşünmürəm. Getmək-qalmaq haqda fikirləşməmişəm. Hazırda "Qarabağ"ın futbolçusuyam, yalnız buna köklənmişəm. Xeyirlisi olsun.
- Komandada məşqçi-futbolçu, evdə ata-oğul kimi bunu necə müzakirə edirsiz, nə danışırsız?
- Tam səmimi deyirəm bu haqda heç bir danışığımız olmayıb.
- Yenidən legioner həyatı yaşamağa cəhd edərsən?
- Yenə deyirəm, bu haqda fikirləşməmişəm, bilmirəm. Necə olacağını görəcəyik. Zaman hər şeyi göstərəcək. Bu məsələ haqda heç bir fikrim yoxdur. Çünki bütün fikrim "Qarabağ"la bağlıdır. Başqa heç nə barədə düşünməmişəm.
- Bu mövsüm də "qızıl dubl" edə biləcəksiz?
- Əlbəttə ki, bizim hədəfimiz həmişə maksimum titul qazanmaqdır. Bu mövsüm də çox istəyirik ki, titullar qazanaq. Nə qədər çox titul qazansaq, həm komandamız üçün, həm də şəxsi karyeramız üçün üstünlükdür. Bunun üçün sona qədər mübarizə aparacağıq.
