Idman.biz
"Düşünürəm, yaxşı oyun keçdi. Rəqib çox yaxşı mübarizə apardı. Biz də istədiyimiz kimi oynaya bilmədik. Çempionlar Liqası, ardından Premyer Liqa oyunu olanda yorğunluq hiss olunur".
Bu sözləri futbolinfo.az saytına açıqlamasında "Qarabağ"ın futbolçusu Musa Qurbanlı deyib.
23 yaşlı hücumçu "Kəpəz" üzərində 1:0 hesablı qələbə qazandıqları matçı belə şərh edib: "Gərgin mübarizə şəraitində keçən oyunun şahidi oldunuz. Amma komandamızda yetərincə futbolçu var, yəni hər iki cəbhədə mübarizə apara bilərik. Əlimizdən gələni edirik ki, daha yaxşı nəticələr qazanaq. 3 xal əldə etdiyimiz üçün sevincliyik".
Qurbanlı Çempionlar Liqasında 2 oyuna 6 xal toplayan komandasının "24-lüy"ə düşməməsi ehtimalından da söz açıb: "Bu barədə düşünmək düzgün olmaz. Mərhələyə başlayarkən belə bir fikir yox idi, amma qələbə qazandıq. İndi növbəti oyuna köklənməliyik. Əgər orada da 3 xal qazana bilsək, bu, bizim üçün böyük uğur olar. Yoxsa, iki qələbə qazanmışıq deyə, dərhal qrupdan çıxmağı gözləmək doğru deyil. Məsələyə real yanaşmalıyıq. Öz gücümüzün fərqindəyik, özümüzə güvənirik və növbəti mərhələyə köklənəcəyik ki, qarşıdakı oyunda da xallar uğrunda mübarizə apara bilək".
Musa Çempionlar Liqasının III turunda üz-üzə gələcəkləri "Atletik" barədə də fikirlərini bölüşüb: "Onlar da çox güclü komandadır. Çempionlar Liqası elə bir turnirdir ki, burada hər rəqib səviyyəlidir və heç kim əvvəlcədən proqnoz verə bilməz. Ümumiyyətlə, çalışırıq ki, heç bir oyuna əvvəlcədən proqnoz verməyək. Belə rəqiblərə qarşı nəsə demək çətindir. Özümüzə güvənirik, bilirik ki, maksimum gücümüzü ortaya qoyacağıq. Əvvəlki oyunlarda qazandığımız qələbələr bizə motivasiya verir, amma eyni zamanda eyforiyaya qapılmamalıyıq. Meydana çıxıb xal və xallar üçün mübarizə aparacağıq".
