Musa Qurbanlı "Karvan-Yevlax" oyunundan sonra fikirlərini bölüşüb

"Qarabağ"ın futbolçusu Musa Qurbanlı "Karvan-Yevlax"a qalib gəldikləri Misli Premyer Liqasının XIII turunun oyunundan sonra jurnalistlərin suallarını cavablandırıb.

Sport24.az həmin müsahibəni təqdim edir…

- Matç sizin üçün necə alındı?
- Təbii ki, asan oyun olmadı, özünüz də gördünüz. Əsas odur ki, üç xalı qazandıq. Bizim üçün qalibiyyət vacib idi. Rəqib çox yaxşı və kompakt müdafiə olunurdu. Bütün fikirləri müdafiə olunmaq idi. Bu mənada, hücum qurmaq, təhlükəli epizodlar yaratmaq çətin idi. Çünki boşluqlar vermirdilər. Amma sonda lazım olan qolları vurduq və qalib gəldik.

- İlk hissədə qol vura bilmədiniz. Rəqibin müdafiə xəttini keçə bilməməyiniz onların yaxşı müdafiə olunması ilə bağlı idi, yoxsa "Qarabağ"ın aparıcı oyunçuların ehtiyatda oturması rol oynadı?
- Rəqibin kompakt müdafiə olunmasını deyərdim.

- Qısa qrafikdə üç oyun oynayacaqsız, çünki kubok görüşü, ardınca liqa və daha sonra Çempionlar Liqası matçına çıxacaqsız. Sıx qrafikə görə heyəti yetərli hesab edirsən?
- Bəli, məncə yetərlidir. Kifayət qədər futbolçumuz var. Düzdür, hər halda, çətinlik, yorğunluq olacaq. Bu da normal haldır. Amma hamımız burada komandamız üçün əlimizdən gələni edirik. Neçə futbolçu olsa da, meydana kim çıxsa da, hamımız burada komandamız üçün can qoyur. Düşünürəm ki, bəs edəcək. Çətin olsa da, həll edək, bu vəzifəni də yerinə yetirək.

- Çempionlar Liqasında "Qarabağ"ın 7 xalı var, "Ayaks"ın isə xalı yoxdur. Bunu komandanız üçün üstünlük hesab edirsən?
- Belə turnirlərdə, belə komandalara qarşı nəsə üstünlükdən danışmaq bir qədər yaxşı fikir deyil. Rəqibləri onsuz da görürük, dünya səviyyəli komandalardır. ÇL-də oynayırıq. Hər matça ciddi hazırlaşacağıq, maksimum xal üçün mübarizə aparacağıq. Sona qədər oynayacağıq.

- Pley-off şanslarınızı necə dəyərləndirirsən?
- Təbii ki, müəyyən şansımız var. Çalışacağıq ki, bu şansdan istifadə edək. Əlimizdən gələni edəcəyik ki, yaxşı nəticə qazanaq.

- "Ayaks", "Ayntraxt" və "Liverpul"la üç oyundan neçə xal qazana bilərsiz?
- Vallah, oturub hesablamamışam. Maksimum çalışacağıq da, nə qədər bacarsaq, o qədər də xal qazanaq. Ümidvaram ki, hər şey yaxşı alınar.