Idman.biz
"Ümumi götürəndə mövsüm pis keçmədi".
Bunu İdman.biz-ə "Qarabağ"ın futbolçusu Musa Qurbanlı deyib.
O, komandasının Misli Premyer Liqasında 12-ci çempionluğunu şərh edib. 23 yaşlı hücumçu bildirib ki, nəticədən xoşbəxtdir: "Çempion olduğumuza görə, çox şadıq. Hər mövsüm qarşımıza qoyulan məqsəd çempionatın qalibi olmaqdır. Buna görə də, hər dəfə çempion olanda eyni dərəcədə sevinirik. İndi də çox sevincliyik".
Qurbanlı mövsümün onun üçün asan keçmədiyini deyib: "Mövsümün əvvəlində zədə alıb əməliyyat oldum. Buna görə də bir qədər geri düşdüm. Zədə səbəbindən çox vaxt itirdim. Bəzi məşqləri və oyunları buraxmalı oldum. Sonlara yaxın formamı bərpa edə bildim. Ancaq hələ çox işləməliyəm. Ümid edirəm ki, gələn mövsüm daha yaxşı olacaq".
Hücumçu yenidən legioner həyatı yaşamaq istəyi ilə bağlı sualı belə cavablandırıb: "Hazırda belə bir fikrim yoxdur, bu istiqamətdə danışığımız da olmayıb. Hələ ki, "Qarabağ"la müqaviləm var və bütün diqqətim burdadır".
Qeyd edək ki, ötən ilin iyununda Ağdam təmsilçisi ilə 23 yaşlı forvard arasında üç illik müqavilə imzalanıb. İsveçin "Yurqorden" klubundan transfer olunan futbolçu 2027-ci ilin yayına qədər komandada çıxış edəcək.
Aytac Sahəd
İdman.biz
