Sport24.az
Cari mövsümdə I Liqada çıxış edən, dünən isə elitaya dönüşünü rəsmiləşdirən "Qəbələ"nin futbolçusu Murad Musayevin Sport24.az-a müsahibəsi
- Komandanız Premyer Liqaya qayıtdı. Təəssüratların necədir?
- Elitaya dönmək "Qəbələ" üçün xoşdur. Çünki hamınız bilirik ki, hər zaman yüksək yerlər uğrunda mübarizə aparmışıq. 1 illik fasilədən sonra yenidən qayıtdıq. Buna görə şadıq. Bu mövsüm fikrimiz, xəyalımız yenidən Premyer Liqaya vəsiqəni təmin etmək idi.
- Çoxları düşünür ki, "Qəbələ"nin işi elə də çətin olmadı. Sənin fikrin necədir?
- Əslində I Liqanın da öz çətinliyi var. Bunun rahatlıqla əldə olunduğunu deyə bilmərəm. Biz hər oyunda motivasiyamızı qorumağı bacardıq. Çətinliklərimiz oldu. Burada tək futbol amili yox, meydan amili də xüsusi rol oynayırdı. Hamı bilir ki, buradakı meydanlar yaxşı vəziyyətdə deyil. Demək istədiyim odur ki, hər liqanın öz çətinliyi və ağırlığı var.
- Növbəti mövsüm ən azı avrokuboklara iddialı "Qəbələ" görə bilərik?
- Məncə, bu vaxtdan sonra rəhbərlik daha sağlam və möhkəm kollektiv formalaşdırmağı düşünəcək. Çünki hər işdə bir xeyir var deyiblər. I Liqaya düşmək bəlkə də klub olaraq inkişaf etməyə, böyüməyə daha böyük təkan olacaq. Hər zamankı kimi möhkəm, istəkli kollektiv formalaşdırıb, növbəti mövsümlərdə daha iddialı ola bilərik.
- "Qəbələ" l Liqaya düşəndə komandanı tərk etmədin. Yəqin ki, sənə də hansısa təkliflər olmuşdu?
- Həqiqətən bir neçə təklif var idi. "Qəbələ" də sözləşməni yeniləmək istəyirdi. I Liqada çıxış etdikdən sonra Premyer Liqaya birlikdə qayıdacağımızı dedilər. Gözləmədiyim halda zədələndim. Çox ağır zədə idi. Elə olan halda qalmağım daha məsləhətli idi. Mən də burada qalmağı və kluba kömək etməyi düşünürdüm. Təkliflərinə də "yox" deməmişdim. Amma başqa təkliflərim də olmuşdu. Sadəcə, düşünmək istəyirdim. Elə oldu ki, zədə aldım və 6-7 ay futboldan uzaq qaldım. Həmin vaxt "Qəbələ" mənə sahib çıxdı. Mən də qalmağa üstünlük verdim.
- Daha neçə il "Qəbələ"də oynamaq istəyirsən?
- 2026-cı ilin yayınadək müqaviləm var. Hər bir halda qərarı rəhbərlik və baş məşqçi verir. Qalmağımı istəsələr, oynayacağam. Əksi olsa, yollarımızı ayıracağıq. Bu futboldur. Hər şey gözləmək olar. Müqaviləm var, amma nə qərar verilsə, ona uyğun hərəkət edəcəyik.
