İdman.biz
"Qarabağ"ın şimali makedoniyalı sabiq futbolçusu Muarem Muaremin İdman.biz-ə müsahibəsi
- 5 mövsüm "Qarabağ"ın formasını geyinmisiz. Sabiq klubunuzun matçlarını izləyirsiz?
- Bəli. "Qarabağ"ın həm Premyer Liqada, həm də avrokuboklardakı oyunlarına baxıram. Avropa Liqasına yaxşı başlamasalar da, 4-cü matçlarında qələbə qazandılar. Azərbaycan çempionatında performansları çox yaxşıdır. "Qarabağ" Avropada artıq təcrübəli komandadır. Ağdamlıların beynəlxalq arenalardakı oyunlarında tərəfdarıyam. Qarşıdakı - həm "Lion"la, həm də digər klublarla qarşılaşmalarda yaxşı nəticələr əldə edəcəyini düşünürəm.
- Sizcə, Qurban Qurbanovun komandamız bugünkü dueldə qalib gələ bilər?
- Fransızlara qarşı matçda qələbə qazanmaq mümkündür. Komanda uzun müddətdir ki, Avropa Liqasında oynayır. Təbii ki, bu Liqa mərhələsi fərqli sistemdə keçirilir. 1 komandaya qarşı sadəcə 1 oyun olur. Bu səbəbdən də diqqətli olmalıdırlar. Çünki revanş şansı yoxdur. Bu da komandaların görüşlərə fərqli hazırlanmasına səbəb olur. "Qarabağ"ın kifayət qədər keyfiyyətli oyunçuları var. "Lion"u məğlub edəcəklərini düşünürəm.
- Siz də "Qarabağ"da olarkən Avropa Liqasında Fransanın "Sent-Etyen" klubuna qarşı oynamışdız. O dönəmi necə xatırlayırsız?
- Bəli, "Qarabağ"da olduğum zaman Fransa klublarından yalnız "Sent-Etyen"lə qarşılaşmışdıq. Hətta ilk Avropa Liqası dönəmimiz idi. Evdə 0:0, səfərdə isə 1:1 hesablı heç-heçə oldu. Rəqib meydanında çox yaxşı oynamışdıq. Həmin dönəm fransalılara qol vura bilməsəm də, "Dnepr"ə qarşı matçda fərqlənmişdim. "Sent-Etyen"lə görüş mən və komanda üçün yaxşı bir təcrübə oldu.
- "Qarabağ"ın pley-offa yüksəlmək şanslarını necə dəyərləndirirsiz?
- 3 məğlubiyyətdən sonra pley-offa yüksəlmək çətin olacaq. Amma Qurban Qurbanovun komandası sona qədər bunun üçün mübarizə aparacaq. Şanslarını artmaq üçün məğlubiyyətlərdən qaçmalıdırlar.
- 2018-ci ildə futbolçu karyeranızı bitirmisiz. Hazırda nə işlə məşğulsuz?
- Baş məşqçi kimi çalışırdım. Düzdür, hazırda işsizəm. Mövsümün əvvəlində Şimali Makedoniyada 1-ci Liqada "Qostivar"a rəhbərlik edirdim. Qarşılıqlı razılıq əsasında yollarımızı ayırdıq. Davam etmək üçün bəzi istəmədiyimiz olaylar oldu. O səbəbdən istefa verdim. Hazırda komanda axtarışındayam.
- Azərbaycandan təklif olsa, qəbul edərsiz?
- Azərbaycan üçün darıxmışam. 5 il orada futbol oynamışam. Azərbaycanda çox tanışlarım var. Bakı üçün da darıxmışam. Azərbaycana qayıtmağı çox istəyirəm. İnanıram ki, təklif gələr və ölkənizdə yenidən işləmək şansım olar.
Emin Ağa
İdman.biz
