Idman.biz
"Qarabağ"ın şansının yüksək olması qələbəyə inam yaradır".
Bu sözləri vaxtilə "Qarabağ"da çıxış etmiş Şimali Makedoniyadan olan veteran futbolçu Muarem Muarem deyib.
O, görüşün "Qarabağ" üçün çətin keçəcəyini bildirib.
"Ayaks" yaxşı durumda deyil. Lakin ehtiyatlı olmaq lazımdır. Rəqib böyük ada və keyfiyyətli futbolçulara sahibdir. Onların xalı olmasa da, bu gün döyüşəcəklər. Bakıdakı görüş böhrandan çıxmaq üçün şansdır. Turniri xalsız bitirməmək üçün çalışacaqlar. "Qarabağ" indiyədək olan intizamını qorusa, qarşılaşmadan qələbə ilə ayrılacaq", - deyə o, AZƏRTAC-a açıqlamasında deyib.
Bu gün Tofiq Bəhramov adına Respublika Stadionunda oynanılacaq "Qarabağ" - "Ayaks" qarşılaşması saat 21:45-də başlayacaq. Matçı sloveniyalı FIFA referisi Rade Obrenoviç idarə edəcək.
Turnir cədvəlində "Qarabağ" yeddi xalla 21-ci pillədə qərarlaşıb. Xalı olmayan "Ayaks" isə sonuncu - 36-cıdır.
Xatırladaq ki, Muarem Muarem "Qarabağ" tarixinin ən önəmli qollarından birinin müəllifidir. O, Ağdam klubunun ilk dəfə Avropa Liqasının qrup mərhələsinə vəsiqə qazandığı 2014-2015-ci illər mövsümündə Niderlandda "Tvente"yə qarşı keçirilmiş pley-off mərhələsinin cavab matçında (1:1) bərabərlik qolunu vurmuşdu. Bakıda rəqibi ilə qolsuz heç-heçəyə razılaşan Ağdam klubu səfər qolu sayəsində qrup mərhələsinə vəsiqə qazanmışdı.
