Sport24.az
Növbəti mövsümdə qarşısına çempionuq hədəfi qoyan "Fənərbaxça" iddialı heyət qurmağı planlaşdırır. Sport24.az xəbər verir ki, "Əl-Nəsr"Con Duranın keçidini həll edən Super Liqa nəhəngi daha bir ulduz futbolçunu transfer etməyə çalışır.
Bu barədə insayder Yağız Sabuncuoğlu məlumat yayıb.
"Fənərbaxça"nın hücum xəttini gücləndirmək üçün əsas hədəflərindən biri PSJ-yə məxsus olan Marko Asensiodur. İstanbul təmsilçisi artıq Fransa klubu ilə ilkin danışıqlara başlayıb.
Baş məşqçi Joze Mourinyo ispaniyalı hücumameyilli yarımmüdafiəçini komandasında görmək istəyir. Portuqaliyalı mütəxəssis şəxsən özü Asensio ilə əlaqə saxlayıb.
Qeyd edək ki, Marko Asensio 2023-cü ilin yayında "Real"dan ayrıldıqdan sonra PSJ-yə keçib. 29 yaşlı futbolçu ötən mövsümün ikinci yarısında icarə əsasında "Aston Villa"da çıxış edib. İspaniya millisinin üzvü Premyer Liqa təmsilçisinin heyətində meydana çıxdığı 21 rəsmi matçda 8 qol və 1 məhsuldar ötürmə ilə yadda qalıb.
