Idman.biz
Azərbaycan millisinin debütantı Lorenzo Mezzotero karyerasını daha iddialı klubda davam etdirə bilər.
İdman.Biz xəbər verir ki, "Sampdoriya"nın 18 yaşlı hücumçusu İtaliya klublarının diqqətini cəlb edib.
"SampNews24" nəşrinin italiyalı jurnalist Nikolo Şiraya istinadən yaydığı məlumata görə, "Yuventus"dan sonra "Monza" da gənc futbolçunun çıxışını izləməyə başlayıb. Belə ki, Monza təmsilçisinin skautu noyabrın 8-də "Karareze" ilə oyunda Mezzoteronun performansını canlı izləyib.
Qeyd edək ki, Mezzotero oktyabrın 31-də "Virtus Entella" ilə görüşdə peşəkar karyerasında ilk qolunu vurub. Onun uğurlu çıxışı "Yuventus", Almaniyanın "Borussiya Dortmund" və Belçikanın "Brügge" klublarının da diqqətini çəkib.
Azərbaycan millisinin qarşıdakı oyunları üçün ilk dəfə dəvət alan hücumçunun "Sampdoriya" ilə müqaviləsi 2028-ci ilin yayına qədərdir.
