Idman.biz
"Monako"da qeyri-adi intizam sistemi yaradılıb: qaydaları pozan və ya məşqə gecikən oyunçular pul cəriməsi əvəzinə "cəza çarxı" fırladırlar.
İdman.Biz-in məlumatına görə, klubun gənc müdafiəçisi Feliks Mavissa bu qaydanın qurbanı olub.
Məşqə gec gələn Mavissa "təkər"i fırladıb və ona ən uğursuz cəzalardan biri düşüb: hər bir oyunçuya yeni iPhone 16 Pro Max almaq. Bu o deməkdir ki, oyunçu ümumi dəyəri təqribən 50.000 avro olan təxminən 30 telefon almalıdır.
Komanda yoldaşları buna "kaş ki daha tez-tez gecikəydin!" deyə zarafatla reaksiya veriblər. Bununla belə, rəhbərlik qeyd edib ki, bu sistem nizam-intizamı qorumağa və komanda ruhunu gücləndirməyə kömək edir.
"Monako" bu qeyri-adi cəzadan ötən mövsümdən istifadə edir, lakin Mavissanın cəzası klub tarixində ən bahalı və yaddaqalan cəza olub.
