Idman.biz
Misli Premyer Liqasında mövsümün ilk 16 turu bəzi baş məşqçilərin oyunların keçirildiyi stadionların ot örtüyü ilə bağlı narazılıqları ilə yadda qalıb.
İdman.Biz futbolplus.az-a istinadən xəbər verir ki, bu məsələdə daha çox "Zirə"nin baş məşqçisi Rəşad Sadıqov və "Sabah"ın çalışdırıcısı Valdas Dambrauskas diqqət çəkib. Etirazlar əsasən Tovuz, Yevlax şəhər stadionları və Quba Olimpiya İdman Kompleksinin stadionu ilə bağlı olub.
Qış fasiləsindən sonra problemlərin aradan qaldırılıb-qaldırılmayacağı ilə bağlı klubların mövqeyi də açıqlanıb. "Turan Tovuz"un mətbuat xidmətinin rəhbəri Süleyman Tağıyev bildirib ki, yanvarın 25-də "Sumqayıt"la keçiriləcək ev oyununa qədər yeni salınmış təbii ot örtüyü tam bərpa olunacaq və əlavə müdaxiləyə ehtiyac yoxdur.
"Karvan-Yevlax"ın idman direktoru Kənan Kərimov isə Yevlax şəhər stadionunun qazonunun UEFA standartlarına cavab verdiyini qeyd edib. Bununla yanaşı, klub ehtiyat meydançasının təbii ot örtüyü ilə təchiz edilərək gələcəkdə tribunalarla təmin olunmasını planlaşdırır. Layihəyə yay aylarında start veriləcək.
Ev oyunlarını Qubada keçirən "İmişli" klubu da qazonun yaxşılaşdırılması üçün addımlar atıb. Klubun mətbuat xidmətinin rəhbəri Leyla Behbudlu bildirib ki, stadion Gənclər və İdman Nazirliyinin balansında olduğundan quruma müraciət edilib və qış fasiləsində ot örtüyünün vəziyyətinin yaxşılaşdırılması ilə bağlı müsbət cavab alınıb.
Beləliklə, Misli Premyer Liqasının ikinci yarısında stadionların ot örtüyü ilə bağlı narazılıqların azalacağı gözlənilir.
