Idman.biz
Misli Premyer Liqasının bombardirlər sıyahısına 14 qolla inamla başçılıq edən Leandro Andrade, qol ötürmələrinin sayında da birincidir. "Qarabağ"ın yarımmüdafiəçisi 8 dəfə fərqlənən komanda yoldaşlarına assistentlik edib.
İdman.biz qol ötürmələri ilə yanaşı, ötürmələrin sayı və dəqiqliyi üzrə fərqlənən futbolçuları da müəyyən edib.
Assistentlikdə Leandronu 6 məhsuldar ötürmə ilə komanda yoldaşları Yassin Benzia və Nəriman Axundzadə, eləcə də, "Sabah"dan Boyan Letiç izləyirlər.
Qol ötürmələrindən əvvəlki ötürmələrdə isə Elvin Cəfərquliyev ("Qarabağ") ön sıradadır – 5. Onun komanda yoldaşı Abdulla Zubirin 4 belə ötürməsi var.
Ümumi ötürmələrin sayında Ruan Renato liderdir. "Zirə"nin futbolçusu 1582 ötürmə verib. Murad Xaçayevdə ("Sumqayıt") bu rəqəm 1579, Con İrasabalda ("Sabah") 1468-dir.
Ötürmələrin dəqiqlik faizində Riçard Almeyda öndədir - 94,03 faiz. "Qarabağ"ı bu qış tərk etmiş braziliyalı 318 ötürməsindən cəmisi 19-nu ünvana çatdıra bilməyib. 1000 və daha çox ötürmə verən futbolçular sırasında lider Aleksey İsayevdir ("Qarabağ") – 92,26 faiz.
Dəqiq ötürmə sayında Murad Xaçayev (1376) Ruan Renatonu (1372) qabaqlayır. Con İrasabal 1292 dəqiq ötürmə ilə 3-cüdür.
Qeyri-dəqiq ötürmələr isə Rauf Hüseynlidə ("Kəpəz", 258) hamıdan çoxdur. Felipe Santosun ("Araz-Naxçıvan") 242, Toral Bayramovun ("Qarabağ") 238 ötürməsi ünvana çatmayıb.
Dəqiq uzun ötürmələrin sayında da Ruan Renato birincidir – 159. Onu 146 ötürmə ilə izləyən 3 futbolçudan ikisi "Kəpəz"dəndir – Rocerio Santos və Yeqor Xvalko. "Sumqayıt"dan Elvin Bədəlovun da dəqiq ötürmələrinin sayı eyni qədərdir.
50 və daha çox dəqiq uzun ötürmə verən futbolçular sırasında dəqiqlik faizinə görə Yassin Benzia ("Qarabağ") birincidir – 74,51 faiz. Onu komanda yoldaşı Patrik Andrade (73,91 faiz) və "Zirə"dən Aydın Bayramov (71,43 faiz) izləyirlər.
Vüqar Məmmədov
İdman.biz
