Lent.az
Hazırda Rumıniya millisinə rəhbərlik edən Mirça Luçesku 2026-cı ilin yayında postunu tərk edəcək.
Lent.az xarici KİV-ə istinadla xəbər verir ki, 79 yaşlı mütəxəssis bir müddət əvvəl Rumıniya Futbol Federasiyasının rəhbərliyi ilə danışıb və 2026-cı il dünya çempionatı seçimə mərhələsinin nəticələrindən asılı olmayaraq milli komandanı tərk etmək qərarını açıqlayıb.
Rumıniya millisi dünya çempionatına vəsiqə qazansa, Luçesku komanda ilə final turnirində çalışacaq, əks halda sonuncu seçmə oyundan sonra postunu tərk edəcək.
Rumıniyalı mütəxəssis qərarının əsas səbəbi kimi yaşını göstərir. Bu ay onun 80 yaşı tamam olur.
Luçeskunun 2024-cü il Avropa çempionatından sonra əvəzlədiyi Edvard Jordanesku Rumıniya millisinin baş məşqçisi postuna qayıda bilər. Avropa çempionatında komandaya rəhbərlik edən və turnirdən sonra ayrılan, hazırda isə Polşa "Legiya"sına rəhbərlik edən 47 yaşlı mütəxəssis əsas namizəd hesab olunur.
Xatırladaq ki, 2026-cı il dünya çempionatının seçmə mərhələsində Rumıniya millisi artıq dörd oyun keçirib, Bosniya və Herseqovinaya uduzub (0:1), San Marinoya (5:1) qalib gəlib, Avstriyaya məğlub olub (1:2) və Kipri (2:0) məğlub edib. Luçeskunun komandası hazırda seçmə qrupda 3-cü yerdədir.
