Sport24.az
"Hamımız Estoniya ilə oyunun vacibliyini dərk edirdik. Ən azı 2 toplu qələbə millimizi C Liqasında saxlaya bilərdi. Təəssüflər olsun heç-heçə oldu". Bu sözləri Sport24.az-a açıqlamasında Arif Əsədov UEFA Millətlər Liqasında yığmanın Estoniyaya qarşı oyununu (0:0) şərh edərkən deyib.
Millinin sabiq məşqçisi yığmanın heyətində estonların sıx müdafiə xəttini yaran futbolçuların çatışmadığını bildirib:
"Matç komandamız üçün yaxşı başlamadı. Amma ilk hissənin ortalarından sonra millimiz üstünlüyü ələ aldı. İkinci hissədə də üstünlük biz tərəfdə idi. Sadəcə qol vura bilmədik. Epizodlarda son nöqtəni qoymaqda problem var idi. Bu da Renat Dadaşov və Mahir Emreli kimi vacib futbolçuların yoxluğundan idi. Ümümi götürsək, estonlar ölkəmizə 1 xal üçün gəlmişdi. Taktikalarını elə qurmuşdular ki, qapılarında qol görməsinlər. Millimizin heyətində oyunu öz üzərinə götürüb Estoniyanın sıx müdafiəsini yaran futbolçu çatmırdı. Düzdür, Elvin Cəfərquliyev zərbələr endirirdi, amma daha çox cərimə meydançasından kənarda. Çətin durumdayıq. Sabah bizi İsveçlə ağır oyun gözləyir. Ümid edək ki, futbolçularımız səfərdən uğurlu nəticə ilə qayıtsınlar.
Qeyd edək ki, isveç - Azərbaycan matçının start fiti sabah Bakı vaxtı ilə 23:45-də səslənəcək.
