İdman.biz
"Mundiala hazırlıqlar yaxşı gedir. Hər şey qaydasındadır. Artıq bu gecə Xorvatiyaya yola düşəcəyik".
İdman.biz xəbər verir ki, bunu minifutbol üzrə Azərbaycan U-23 millisinin kapitanı Ələkbər Şəbiyev deyib.
O, yığmamızın Xorvatiyada keçiriləcək dünya çempionatına hazırlığını dəyərləndirib: "Komandada əhval-ruhiyyə yaxşıdır. Bu gün son məşqimizdir. Tam şəkildə hazır olduğumuzu düşünürəm. Hədəfimiz çempionluqdur. Ən yaxşı nəticəni vermək üçün köklənmişik. Pis halda medal götürmək istəyirik".
Ələkbər onları gözləyən çətinliklərə də münasibət bildirib: "Baş məşqçimiz Rəcəb Fərəczadənin həm xasiyyətində, həm də futbol biliyinə bələdəm. O, bu işin başındadırsa, ən yüksək nəticə üçün gedirik. Çətinliyimiz rəqibləri tanımamaqla bağlıdır. Amma bu bizim üçün bir bəhanə deyil. Çətinlikdən çəkinmirik. Çünki rəqiblər də bizi tanımırlar. Bizə necə çətindirsə, onlara da elədir".
Qeyd edək ki, dünya çempionatında millimiz Çexiya, Serbiya və Hindistanla bir qrupda mübarizə aparacaq.
Emin Ağa
İdman.biz
