Sport24.az
Millinin yeni baş məşqçisi kim olacaq? Sport24.az xəbər verir ki, bu sual hələ də açıq olaraq qalır. Yığmanın növbəti oyununa saylı günlər qalsa da, hələ ki, ölkənin əsas komandasına kimin rəhbərlik edəcəyi bilinmir.
Srağagün Ayxan Abbasovun AFFA-nın şərtini qəbul etmədiyini xəbər vermişdik. Bildirmişdik ki, Ukrayna ilə matçda baş məşqçi funksiyasını yerinə yetirən Abbasov yalnız bir halda millini qarşıdakı 4 oyuna çıxara bilər ki, onunla tam əsaslı müqavilə imzalansın. Əks halda 44 yaşlı mütəxəssis ağır yükün altına girmək istəmir.
Etibarlı mənbədən redaksiyamıza daxil olan bilgiyə əsasən, assosiasiya ilə Abbasov arasında danışıqlar davam edir və yaxın günlərdə yekunlaşmalıdır. Tərəflər arasında razılıq əldə olunmasa AFFA rəhbərliyi yeni baş məşqçi axtarışına çıxacaq.
Mənbəmiz onu da bildirib ki, Ayxan bəylə ortaq məxrəcə gəlmək mümkün olmasa, ölkə futboluna cavabdehlik daşıyan rəsmilər növbəti dəfə "sükan arxasına" əcnəbi mütəxəssis dəvət edəcək.
