Idman.biz
"Azərbaycan millisinin İslandiyaya 0:5 hesavblı məğlubiyyəti, konkret, biabırçılıqdır! Buna başqa bir ad vermək və ya haqq qazandırmaq ən azı doğru olmazdı".
İdman.biz bildirir ki, bunu Sportnet.az-a açıqlamasında Milli Məclisin deputatı Vüqar İsgəndərov deyib.
Parlamentin Gənclər və idman komitəsinin üzvü kimi də çalışan İsgəndərov AFFA-nın baş katibi Cahangir Fərəcullayevin fikirləri ilə tam razı olduğunu bildirib: "Komandanın baş məşqçisinin özü istefa verməlidir. O, millini heç cür formalaşdıra bilməyib. Yığma onun gəlişindən sonra əvvəllər sərgilədiyi oyunun ən zəifini nümayiş etdirir. Digər tərəfdən, kollektivdə yüksək əhval-ruhiyyənin olmaması, oyunçular, xətlər arasında əlaqələrin zəifliyi və futbolçularda bir növ ruh düşkünlüyünün görünməsi kimi məqamlar baş məşqçinin yerində olmadığını açıq-aydın göstərir".
Keçmiş idmançı bu məsələdə bütün məsuliyyəti baş məşqçi Fernandu Santuşun daşımalı olduğunu vurğulayıb:
"Təbii ki, bəzi şəxslər bunu AFFA ilə əlaqələndirməyə çalışırlar. Hələlik milli assosiasiya rəhbərliyi yenidir və onların işi yalnız milli ilə çalışmaqdan ibarət deyil, ümumilikdə ölkədə futbolun inkişafını təmin etmək, dəstəkləməkdir. Premyer Liqa, I və II Liqa, Region Liqası və uşaq liqalarında işlər görülür, konkret proqram mövcuddur. Bu mənada, hazırda əsas məsələ millinin qeyri-qənaətbəxş oyun nümayiş etdirməsidir. Komandanın oyununu izlədikdə hər birimizə tam hasil olur ki, baş məşqçi yerində deyil. Koordinasiya, motivasiya yoxdur, dəst-xətt aydın deyil, xətlərarası və oyunçular arasıdakı qarşılıqlı münasibətlər yerində deyil. Bunların hər biri oyun zamanı görünür və təbii ki, hamısı baş məşqçi ilə əlaqəli məsələlərdir".
İsgəndərovun sözlərinə görə, milli komanda "Qarabağ"dan alınan böyük güc, sevinc və stimulu öldürür: "Qrupun Fransa və Ukraynaya nəzərən zəif komandası ilə matçda belə oyun nümayiş etdiririksə və böyük hesabla, biabırçı formada uduzuruqsa, bu, təbii ki, hər birimizdə təəssüf hissi doğurur. Millidə təxirəsalınmaz işlər görülməli, məşqçilər korpusuna yenidən baxılmalı, Azərbaycanda yaşayan, çempionat oyunlarını daim izləyən baş məşqçi təyin olunmalı və o, özü üçün tutduğu proqram əsasında komandaya yanaşmalıdır. Hazırda bunların heç birinin görünməməsi təəssüf doğurur. Düşünürük ki, AFFA rəhbərliyi bu məsələlərlə bağlı təcili və təxirəsalınmaz ölçülər götürəcək, tədbirlər həyata keçirəcək".
İdman.biz
