Sport24.az
RƏŞAD QASIMOV
Nə yazasan, nə deyəsən, türklər demiş, kimi suçlayasan? Neçə illərdir belə davam edir və ən pisi də odur ki, düzələcəyinə də ümid yoxdur. Artıq bəhanələr də bitib. Dünən Reykyavikdə, Barseluşda yaşanan faciə... Vallah söz tapa bilmirəm ki, nə düşündüyümü sizlərə çatdıra bilim. Fikirləşdiyimi bura yazası olsam...
Dünəndən bu yana hamı, hətta AFFA-nın baş katibi Cahangir Fərəcullayev də Fernandu Santuşu linç edir, İslaniyada yaşananlara görə, portuqaliyalını günahlandırır. Bəli, mən razı, istənilən halda nəticəyə görə baş məşqçi məsuliyyət daşıyır. Ola bilsin, Fərəcullayevin təbirincə desək, o, komandanı İslandiya ilə oyuna hazırlaya bilməyib. Bəs futbolçular, millinin heyətində meydana çıxanlar, üzərində gerbimiz olan formanı geyinənlər? Onlarda günah yoxdu?
Taktikanı, sistemi qoyaq kənara, bəs komanda ruhuna, əzmkarlığa nə deyək? Reykyavikdə meydana sanki, Azərbaycan yığması adına (bağışlayın ifadəmə görə) meyitlər çıxmışdı. Komandanın "dirijoru" olmalı olan Emin Mahmudov "Neftçi"də olduğu kimi sürünürdü. Müdafiədə Bəhlul-Elvin tandemi başsız atlıya bənzəyirdilər, cinahlar oyundan qopmuşdu, hücumdan isə danışmağa dəyməz... Qapısında 5 qol görən Şahruddin Məhəmmədəliyev olmasaydı, hesab daha böyük olacağına şübhə etmirik.
Tutaq ki, yenə Fərəcullayevə istinadən deyək, Santuşu yola saldıq, nə dəyişəcək? Meydana çıxan Mahirdi, Bəhluldu, Emindi. Yeni gələn mütəxəssis milli forması geyinənlərə sıfırdan futbol oynamağı öyrədəcək? Yox, qardaş, mümkün deyil. Elvinin, Abbasın, Səbuhinin səviyyəsi budu, bu yaşdan sonra isə "baqajını" artırmayacaq. Dünəndən bu yana hərə bir fikir səsləndirir, məğlubiyyətin, faciəvi məğlubiyyətin məsuliyyətini kimin və ya kimlərinsə boynuna qoymağa çalışır. Hətta bəziləri Santuşu yola salmaq üçün futbolçuların bilərəkdən bərbad oynadığını söyləyir. Bu mümkün deyil. Millidə belə hal yaşana bilməz! Əgər doğrundan da belə olubsa, bunun bir adı var: şərəfsizlik! Bir məşqçini yola salmaq üçün ölkənin adını biabır etmək ən böyük alçaqlıqdır! (ürəyimdən daha ağır söz yazmaq keçsə də, etikanı nəzərə aldım). Bunun da ömrü 40 gündən çox çəkməz.
Çıxış yolu? Yoxdu. Taleyimizlə barışıb, özümüzü psixoloji olaraq növbəti faciələrə, daha bir "Oser faciəsi"nə hazırlamalıyıq. Legioner limitinin ləğvi? Boş söhbətdi. Dünən adını nə tələffüz, nə də yaza bildiyim stadionda meydana çıxanların hamısı demək olar ki, öz komandalarında əsas heyətdə oynayanlar idi...
P.S. Bizdə cənazəni evdən çıxaranda 3 dəfə qaldırıb yerə qoyurlar. Əldə etdiyimiz eksklüziv məlumata görə, İslandiyada ənənəyə görə bunu 5 dəfə edirlər. Bu üzdən dünən Reykyavikdə bizim yığmanı 5 dəfə qaldırıb yerə qoydular.
