Idman.biz
"Sözün əsl mənasında dövrümüzün, zəmanəmizin ən gözəl vaxtını yaşayırıq. Çünki həm siyasi platformadakı qələbələrimiz, torpaqlarımızı işğaldan azad etməyimiz, oranı qurub-yaratmağımız, beynəlxalq arenada gücümüzün və nüfuzumuzun artması, həm də təbii olaraq "Qarabağ" futbol klubunun bu mənada həmin qələbələrin idman siyasətimizdə davamını gətirməsi hər birimizi bir azərbaycanlı kimi qürurlandırır".
İdman.biz bildirir ki, bu sözləri millət vəkili Vüqar İskəndərov Sportnet.az-a deyib.
"Qarabağ yalnız futbol klubumuzun adı deyil, o həm də 30 ilə yaxın yaralı yerimiz olan Qarabağın simvolik olaraq adını daşıyır. "Qarabağ" son qələbəmizdən – 2020-ci ildən, daha sonra isə 2023-cü ildə aparılan antiterror tədbirlərindən sonrakı uğurlarımızın davamını özündə simvolizə edir", - o, bildirib.
Millət vəklinin sözlərinə görə, bu qələbələr yalnız futbol arenasındakı oyun performansı ilə ölçülmür: "Qarabağ"ın "Benfika" üzərindəki qələbəsi bütün Türk dünyasını qürurlandırdı. Bu gün Qazaxıstandan, Özbəkistandan, Türkiyədən, Türkmənistandan, Qırğızıstandan dostlarımızın təbriklərini alırıq. O qədər təbrik gəlir ki, artıq sayını itirmişəm. Xüsusən, Türkiyədən olan dostlarımız "Benfika" kimi öz klublarını - "Fənərbaxça"nı məğlub etmiş bir komandanın digər türk klubuna uduzmasının qürurunu yaşayırlar.
Qarabağ necə ki siyasi aləmdə bütün Türk dünyasını dirçəldib, qürurunu özünə qaytarıb, torpaqlarımızı işğaldan azad etməklə millətimizin şərəfini yüksəldib, eyni missiyanı futbol sahəsində də davam etdirir. Bu qələbə həm də ona görə dəyərlidir ki, hardasa 25 milyon avroya yaxın büdcə ilə oynayan "Qarabağ" ondan qat-qat böyük büdcəyə sahib klubları öz meydanında məğlub edir.
Hazırda futbol aləmi Azərbaycandan, Qarabağdan danışır. Bu isə bir daha Azərbaycanın gücünü, qüdrətini nümayiş etdirir. Biz bu gün bütün sahələrdə inkişaf edirik, inkişaf edən dövlətlər siyahısındayıq. Azərbaycan artıq dünyada söz sahiblərindən birinə çevrilməkdədir. Eləcə də futbol klubumuz dünya və Avropa klubları içərisində xüsusi reytinqə malikdir. Artıq "Qarabağ"dan çəkinməyən klub yoxdur, çünki bu komandanın oyun performansı unikal dəyərə sahibdir".
Milli Məclisin deputatı əmindir ki, az büdcə ilə belə bir klubun ərsəyə gəlməsi, Qurban Qurbanovun rəhbərliyi altında motivasiyasının ən yüksək səviyyədə olması, oyunçular arasındakı əlaqənin güclü qurulması və klubun vahid komanda halında formalaşması ölkəmizin də bir yumruq kimi birləşməsini özündə simvolizə edir.
Ötən gün "Qarabağ" ümumi mərhələnin ilk oyununda səfərdə "Benfika"nı 3:2 hesabı ilə məğlub edib.
İdman.biz
