Sport24.az
"Mən "Qarabağ" fanatıyam. Ağdam təmsilçisinin oyunlarına da tez-tez gedirəm. Dünən mənim üçün əlamətdar gün idi. Belə ki, həm doğum günüm idi, həm də Ağdam klubu Çempionlar Liqasının pley-off mərhələsində cavab matçına çıxırdı. Çox istəyirdim ki, ad günümdə "Qarabağ"ın uğurunu görüm. Qurban Qurbanov yetirmələrinin Çempionlar Liqasının qrupuna düşməsini çox istəyirdim. Təəssüf ki, alınmadı". Bu sözləri Sport24.az-a açıqlamasında məşhur meyxana ustası Baləli deyib.
Baləli qarşılaşmanın taleyinin penaltilər seriyasında həll olunacağını proqnozlaşdırırmış: "Səmimi deyim ki, qarşılaşmanın əsas vaxtında "Qarabağ"ın 4:1 hesabı ilə qələbə qazanacağını gözləyirdim. Qolları da Zubir, Juninyo, Bəhlul və Toralın vuracağını düşünürdüm. İstəyirdim ki, matçın müqəddartına penaltilər seriyasında aydınlıq gəlsin. Amma görünən odur ki, səfərdə 3 top fərqiylə məğlubiyyət, xorvatların ehtiyatlı və daha istəkli olması doğma komandamızı qələbədən və qrup mərhələsindən etdi. Məyus olmağa dəyməz. Əksinə, "Qarabağ"ımıza Avropa Liqasının qrupunda daha da güclü dəstək verməliyik".
Qeyd edək ki, "Qarabağ" dünən Çempionlar Liqasının pley-off mərhələsinin cavab oyununda "Tofiq Bəhramov"da Zaqreb "Dinamo"suna 0:2 hesabı ilə məğlub olub.
ABDULLA İSMAYILOĞLU
