Idman.biz
Türkiyə millisinin sabiq futbolçusu, karyerası ərzində Fransanın PSJ və Türkiyənin "Fənərbaxça" komandalarının formasını geyinmiş Mevlüt Erdinç "Qarabağ"ın UEFA Çempionlar Liqasında (ÇL) göstərdiyi nəticələri dəyərləndirib, Azərbaycan milli komandası ilə bağlı təəssüratlarını bölüşüb.
Veteran hücumçu 2014-cü ildə Fransanın "Sent-Etyen" klubunun heyətində Bakıda "Qarabağ"a qarşı keçirdiyi görüşü (0:0) hələ də böyük məmnuniyyətlə xatırladığını, Ağdam təmsilçisinin o vaxtdan bu günə qədər çox inkişaf etdiyini söyləyib: "Matç qolsuz heç-heçə ilə yekunlaşmışdı. Tofiq Bəhramov adına Respublika Stadionunda çox gözəl atmosfer var idi. Qurban Qurbanov çox təcrübəli məşqçidir və komandası onun rəhbərliyi altında Çempionlar Liqasında olduqca yaxşı çıxış edir. Bir türk olaraq, qardaş ölkə Azərbaycanla qürur duyuram", - deyə AZƏRTAC-a açıqlamasında deyib.
M. Erdinç "köhlən atlar"ın Liqa mərhələsində noyabrın 26-da İtaliyada "Napoli"yə qarşı keçirəcəyi V tur qarşılaşmasında da şanslarının az olmadığını vurğulayıb: "Napoli" çox güclü heyətə malikdir, amma "Qarabağ" Çempionlar Liqasında müsbət nəticələr qazanır və artıq özünəinamla oynayır. Yarımmüdafiəçi Abdullah Zubirlə futbolçu kimi qarşılaşmışam. Texnikalı və təcrübəli oyunçudur. Ümid edirəm ki, İtaliya təmsilçisindən xal ala bilərlər".
38 yaşlı keçmiş hücumçu Azərbaycan milli komandası barədə də fikirlərini açıqlayıb: "Daha əvvəl Azərbaycan millisindən təklif almamışam, amma gələcəkdə niyə də olmasın? Bu barədə düşünə bilərəm. Çünki həm "Qarabağ", həm də ümumilikdə Azərbaycan futbolu çox gözəl gələcəyə sahibdir".
