Mert Çelik: “Bu sualdan yayınmaq istərdim”

Premyer Liqanın IV turunda "Səbail" mövsümdə ilk qələbəsini qazanıb. "Dənizçilər" doğma meydanda "Kəpəz"i 4:0 məğlub ediblər. Bayıl təmsilçisinin bu yay heyətinə qatdığı Mert Çelik Sport24.az-a müsahibə verib. Müdafiəçi komandasının qələbəsindən, Azərbaycana qayıdışından danışmaqla yanaşı bizi maraqlandıran başqa sualları da cavablandırıb.  

- Nəhayət ki, IV turda üç xal qazandız. Qələbəylə bağlı fikirlərin maraqlıdı...
- Qələbəyə ehtiyacımız var idi. Əvvəlki qarşılaşmalarda qələbəyə yaxın olsaq da, qismət "Kəpəz"lə oyuna imiş. Ümid edirəm ki, qarşıdakı matçlarda uğurlu çıxışıçızı davam etdirəcəyik.

- Əvvəlki 3 matçda qələbə qazana bilməməyinizin səbəbi nə idi?
- Yeni qurulan komandayıq. Özüm də daxil, bir çox oyunçular klubda təzədilər. Turlar ötdükcə bir-birimizə daha çox uyğunlaşacağıq. Fikrimcə, "Kəpəz"lə oyunda meydanda bir-birini daha yaxşı anlaşan komanda var idi.

- "Səbail"in qarşısına hansı məqsəd qoyulub?
- Hər oyunda yaxşı performans sərgiləməklə maksimum xal toplayıb irəli getmək istəyirik. Ümid edirəm ki, finişdə adımıza layiq yerdə olacağıq.

- Azərbaycana qayıdışın barədə nə deyərdin?
- Türkiyədə olduğum müddətdə daim Azərbaycan haqqında düşünürdüm. Daim Premyer Liqanı izləyirdim. Tanışlarıma həmişə Azərbaycan, Bakı və ölkə futbolu haqqında danışırdım. Odur ki, bura qayıdışımdan çox xoşbəxtəm. Ümid edirəm "Səbail"də uğur qazanacam. Bu mövsüm elitada daha gərgin mübarizə gedəcəyini düşünürəm.

- Türkiyədən baxanda Azərbaycan futbolu necə görünür?
- "Qarabağ"ın qitəmiqyaslı yarışlarda illərdi sabit çıxışı hamıya məlumdu. Qurban Qurbanovun komandasının Avropa Liqasında çıxışı Türkiyədə böyük coşquyla qarşılandı. Ağdam təmsilçisinə Türkiyədə də rəğbət bəsləyənlər, uğurlarına sevinənlər çoxdu.

- Həm "Qarabağ", həm də "Qalatasaray" ÇL-in pley-offunun ilk qarşılaşmasında məğlub oldular. Səncə, hər iki komanda geridönüş edə biləcək?
- Hər iki komanda avrokuboklarda bir çox güclü rəqibləri gözüyaşlı qoymağı bacarıblar. Ona görə iki kollektivin cavab matçında uğur qazanacaqlarına inanıram.

- Yaşamağa Türkiyə, yoxsa Azərbaycan yaxşıdı?
- Bu sualdan yayınmaq istərdim (gülür). Hər iki ölkədə yaşamağın yaxşı tərəfləri var. Mənə görə hər iki qardaş dövlətdə yaşamaq rahat və xoşdu.

ABDULLA İSMAYILOĞLU