Sport24.az
"Səbail"in müdafiəçisi Mert Çelik Sport24.az-a müsahibə verib. 24 yaşlı müdafiəçi komandasının uğursuz çıxışına münasibət bildirməklə yanaşı, bizi maraqlandıran başqa sualları da cavablandırıb
- Bu mövsüm transfer olunduğun "Səbail" son pillədədi. Yayda verdiyin qərara görə peşman deyilsən?
- "Səbail"ə keçidimlə bağlı peşman deyiləm. Yaxşı ki, belə bir klubda çıxış edirəm. İlk gəldiyim gündən etibarən komandadakı hər kəsdən səmimi münasibət görmüşəm. Bir futbolçu üçün tək oyunlar yox, meydandan kənar amillər də vacidir. "Səbail"də isə hər şey yüksək səviyyədədir. Təbii ki, heç bir futbolçu klubunun son pillədə qərarlaşmasını istəməz. Bu vəziyyətdən çıxmaq üçün çalışacağıq.
- Öz çıxışın barədə nə düşünürsən?
- Oyunumla bağlı fikir bildirməyim nə dərəcədə doğrudur, bilmirəm. Amma meydanda olduğum hər matçda komandama fayda vermək üçün əlimdən gələni etməyə çalışıram. Hər dəfə daha yaxşı oyun nümayiş etdirmək istəyirəm. Burda əsas olan mənim fərdi çıxışımın uğurlu olması deyil, komandamızın uğurlu olmasıdır. Bunun üçün də əlimdən gələnin daha artığın etməyə hazıram.
- Geridə qalan 15 turda qapısında 27 qol görən komandanın müdafiəçisi kimi problemi nədə görürsən?
- Bir neçə oyunda çox qol buraxdığımıza görə statistika belədir. Təbii ki, müdafiəçi kimi bu vəziyyətdən razı ola bilmərəm. Qol vurub qol buraxırıq. Bunun üzərində işləyirik. Ümid edirəm ki, bu problem həll olacaq və komandamız daha yaxşı nəticələr qazanacaq.
- Cavid Hüseynovun özəllikləri nədədi?
- Baş məşqçi, məşqçilər korpusu və bütün kollektiv hazırda növbəti qarşılaşmalarda uğurlu nəticə əldə etmək üçün çalışır. Baş məşqçimizin rəhbərliyi ilə məqsədimizə nail olacağımıza inanıram. O bizə bunun üçün motivasiyya verir. Səhvlərimizi analiz edərək bunu təkrarlamamağımız üçün çalışır.
- Premyer Liqanı heç kim tərk etmək istəmir. Ancaq hazırda I Liqaya düşməyə ən real namizəd kimi sizin komandanın adı çəkilir…
- Hamı vəziyyəti dərk edir və bunu dəyişmək üçün çalışır. Qarşıda hələ çox oyunumuz var. Uğursuz gedişadata son qoyub xallar qazanaraq son pillədən uzaqlaşmaq istəyirik. Buna nail olacağımıza inanıram. Komandamıza güvənirəm. Hər kəs əlindən gələnin ən yaxşısını edir. Meydanda son dəqiqəyə qədər vuruşur, mübarizə aparır.
