İdman.biz
"İlk matçda yaxşı mübarizə apardıq və bəhrəsini gördük".
Bunu İdman.bizə "Zirə"nin futbolçusu Məqsəd İsayev deyib.
O, komandasının Konfrans Liqasının III təsnifat mərhələsində "Osiyek"lə keçiriləcək cavab matçını şərh edib. 30 yaşlı müdafiəçinin sözlərinə görə, Xorvatiya təmsilçisi olduqca təhlükəli rəqibdir: "Hər an nəsə edə biləcək potensiala malikdirlər. Təbii ki, onlar da Bakıya mərhələ keçməyə gəlirlər. Ağır oyun olacağını bilirik. Bu səbəbdən də qarşılaşmaya çox ciddi hazırlaşırıq. Düşünürəm ki, yaxşı mübarizə aparıb səhvləri minimuma endirsək, yaxşı olacaq. Ən əsas məsələ xarakter göstərib, qalib gəlməliyik. Evdə oynadığımız üçün də azarkeşlərin dəstəyi bizim üçün önəmlidir. Bütün gücümüzü ortaya qoyub, qələbə üçün vuruşacağıq".
Qeyd edək ki, "Zirə" - "Osiyek" qarşılaşması sabah saat 20:30-da "Dalğa Arena"da keçiriləcək. İlk görüş isə 1:1 hesabı ilə bitib.
Banuçiçək Hüseynli
İdman.biz
