Məqsəd İsayev: “Acı reallıq var ki, onunla barışmaq məcburiyyətindəyik”

"Zirə"nin müdafiəçisi Məqsəd İsayev Sport24.az-a müsahibə verib. Futbolçu Premyer Liqanın VI turunda "Neftçi"ni məğlub etdikləri matçla bağlı fikirlərini bölüşməklə yanaşı, bizi maraqlandıran başqa sualları da cavablandırıb.

- Öncə "Neftçi" ilə oyununuz barədə fikirini bölüşərdin. Rəqibi nəyin hesabına üstələdiz?

- Əvvəlki iki görüşdə məğlub olmuşduq. Bu üzdən qələbə qazanmaq istəyimiz böyük idi. Şükürlər olsun ki, 90 dəqiqənin sonunda sevinən tərəf biz olduq. Baş məşqçinin tapşırıqlarını meydanda düzgün yerinə yetirdik və bunun sayəsində də qələbə qazandıq.

- Ardıcıl məğlubiyyətləriniz səbəbi nə idi?

- Avrokubokda oynayırdıq. İki cəbhədə mübarizə aparmaq bir qədər çətindi. Açığı, sıx qrafik, uzun yolçuluq bizi yorurdu. Məqsədimiz qrup mərhələsinə vəsiqə qazanmaq olsa da, təəssüf ki, bunu bacarmadıq. İndi bütün diqqətimizi Premyer Liqaya yönəltmişik.

- "Zirə" bu heyətlə, belə oyunla çempionluğa iddialı ola bilər?

- Acı reallıq var ki, onunla barışmaq məcburiyyətindəyik. Etiraf edək ki, "Qarabağ" çempionatda digər klubları üstələyir. Qurban Qurbanovun komandasının səviyyəsi hər kəsə məlumdu. Buna baxmayaraq, uğur qazanmaq, tunir cədvəlinin üst pillələrində yer almaq üçün qarşıdakı 30 turun hər birində son saniyələrə kimi mübarizə aparacağıq. Əsas məqsəd mövsümün sonunda mükafatçılar arasında olmaqdı.

ABDULLA İSMAYILOĞLU