Idman.biz
AFFA və Elm və Təhsil Nazirliyinin birgə təşkilatçılığı, UEFA-nın dəstəyilə Gəncə şəhərində yerləşən məktəblər arasında keçirilən minifutbol turniri başa çatıb.
İdman.biz xəbər verir ki, məktəblərdə Futbol Dərsi layihəsi çərçivəsində keçirilən minifutbol turninin final mərhələsi Gəncə şəhəri İsmət Qayıbov adına 1 saylı tam orta məktəbin idman meydançasında baş tutub.
Turnirin final qarşılaşmasından öncə bir qrup rəsmi şəxs Gəncə şəhəri Heydər Əliyev Mərkəzi önündə Ümummilli lider Heydər Əliyevin büstünü ziyarət edib.
Turnirin final qarşılaşmasında 1 saylı tam orta məktəbin kollektivi 39 saylı tam orta məktəbin kollektivi üzərində qələbə qazanaraq turnirin qalibi olub.
Qalib komanda kubok və medallarla, digər yerləri tutan komandalar isə müvafiq medallarla təltif ediliblər.
Turnirdə fərqlənmiş oyunçular müxtəlif nominasiyalar üzrə mükafatlandırılıblar.
Kuboku və mükafatları iştirakçılara AFFA-nın Kütləvi Futbol Departamentinin rəhbəri Fərrux İsmayılov təqdim edib. Həmçinin, turnirin final mərhələsinə ev sahibliyi etdiyinə, eləcə də, təşkilati işlərdə xüsusi fərqləndiyinə görə 1 saylı tam orta məktəbə AFFA tərəfindən xüsusi hədiyyə təqdim edilib. Hədiyyə məktəbin direktoru Elvin Mehdizadəyə Fərrux İsmayılov tərəfindən verilib.
İdman.biz
