Idman.biz
"Sumqayıt" komandasının qapıçısı Mehdi Cənnətovun Sportnet.az-a müsahibəsi
- İki qələbədən sonra heç-heçə etdiniz. Oyunu necə şərh edərdiniz?
- Prinsipcə, ağır oyun alındı. Hər iki komandanın qol vurmaq üçün yaxşı imkanları oldu. Hesab edirəm ki, heç-heçə ədalətli nəticədir. Meydandan "sülh"lə ayrıldıq. İşləməyə davam edəcək və növbəti oyuna hazırlaşacağıq.
- Komandanız çempionatda 3 turdan sonra 7 xalla liderdir, özünüz ilk qolu bu gün buraxdınız. Amma İslandiya və Ukraynaya qarşı dünya çempionatının seçmə qrup oyunları üçün Azərbaycan millisinə dəvət almamısınız. Baş məşqçi Fernandu Santuşun bu qərarını necə qarşıladınız?
- Öz oyunumuza adi qaydada hazırlaşır, milli barədə düşünmürdüm. İlk növbədə, bütün fikirlərim "Şamaxı"ya qarşı oyunda idi. Yığmanın baş məşqçisi qərarını şərh edib. Mənim əlavə edəcək sözüm yoxdur. Bu situasiyada həmyerlilərimə qarşıdakı oyunlarda yalnız uğurlar və bizi sevindirmələrini arzulaya bilərəm.
- Santus sizin pasportla bağlı probleminizin olduğunu açıqlayıb. Doğrudanmı belə probleminiz var?
- Açığı, bunu şərh etmək mənim üçün çətindir. Buna görə də şərhsiz keçinirəm. Ən yaxşısı, gərək vəziyyəti öyrənim.
- Deməli, millinin baş məşqçisi düzgün açıqlama verməyib...
- Mən bilmirəm. Bu barədə şərh verə bilmərəm.
- Sizin sənədlə bağlı probleminiz varmı?
- Bu barədə eşitməmişəm.
- Düşünmürsünüzmü ki, milliyə çağırılanların siyahısı hələ Premyer Liqa start götürməmişdən hazırlanıb?
- Kimin millidə olacağına baş məşqçi qərar verir. O, çempionatı izləyir, yəqin ki, kimi çağırmağın gərəkliyini, kimin faydalı olacağını görür, bilir. Buna görə də milliyə yalnız uğurlar arzulaya bilərəm.
- AFFA məsələni belə şərh edib ki, adınız ilkin siyahıda olmayıb, sonradan çağırılmaq istədikdə isə viza almağa vaxt çatmayıb. Ümumiyyətlə, sizə milli assosiasiyadan müraciət olubmu?
- Mənim pasportum AFFA-dadır. Qalan məsələləri bilmirəm. Ola bilsin, həqiqətən də çatdıra bilməyiblər. Mən bunu öyrənə bilmərəm. Ona görə də şərhim yoxdur.
- Xarici pasportunuzun vaxtı bitməyib?
- Yəqin ki, yox (gülür - red.).
- Milliyə çağırılan qapıçılardan Şahrudin Məhəmmədəliyevin oyun praktikası azdır, Aydın Bayramov və Rza Cəfərov isə klublarında oynamırlar. Belə qapıçı heyəti ilə nəyə ümid etmək olar?
- Hesab edirəm ki, hər üçü Azərbaycan millisində oynamağa layiqdir.
- Lakin Santuş oyun praktikası olmayanları yığmaya çağırmayacağını bildirib...
- Bunu şərh etmək mənim üçün çətindir. Özü daha yaxşı bilir, görür. Köməkçiləri bu mənada ona yardımçı olurlar. Milliyə çağırılanlar problemsiz oynaya biləcəklər.
- Milli fasilə "Sumqayıt"a necə təsir edə bilər?
- Ümidvaram ki, təsiri yaxşılığa doğru olacaq. Çünki bütün komanda təlim-məşq toplanışında olacaq. Birlikdə kifayət qədər məşq edəcək, səfərdə "İmişli"yə qarşı keçirəcəyimiz növbəti oyuna hazırlaşacağıq. Fikrimcə, xeyrimizə olmalıdır.
İdman.biz
