Mbappe və PSJ arasında 663 milyon avroluq məhkəmə çəkişməsi

Kilian Mbappe ilə PSJ arasındakı anlaşılmazlıq məhkəməyə verilib və ümumi məbləği 663 milyon avro olan təzminat iddiaları irəli sürülüb. 

Lent.az xarici KİV-ə istinadla bildirir ki, PSJ keçmiş hücumçusundan 440 milyon avro, Mbappe isə klubdan 263 milyon avro tələb edir. Bu, futbol tarixində bir oyunçu ilə bir klub arasında ən böyük məhkəmə çəkişməsi kimi tarixə düşməyə hazırlaşır. Məhkəmənin qərarı üçün hələlik konkret tarix açıqlanmayıb, lakin prosesin olduqca çətin olacağı gözlənilir.

Kilian Mbappe ilə PSJ arasında 2024-cü ilin yayından bəri həll olunmayan mübahisə Paris Əmək Məhkəməsində keçirilən dinləmə ilə rəsmiləşdirilib. Tərəflər uzun müddətdir davam edən müqavilə və ödəniş mübahisələri zamanı ilk dəfə üz-üzə görüşüblər.

PSJ keçmiş hücumçusu Mbappedən rekord məbləğdə təzminat tələb edib. Dinləmədən sonra klubun vəkili Renaud Semerdcian PSJ-nin ümumilikdə 440 milyon avro tələb etdiyini açıqlayıb. Tələblərə klubun imicinə dəyən ziyan, müqavilənin səbəblərinin gizlədilməsi və Mbappenin rədd etdiyi iddia edilən "Əl-Hilal"ın 300 milyon avroluq təklifindən irəli gələn transfer imkanlarının itirilməsi daxildir. PSJ Mbappenin pulsuz getməmək vədini pozduğunu iddia edir.

Lakin Mbappenin müdafiəçiləri PSJ-nin iddialarını rədd edir və klubdan ümumilikdə 263 milyon avro tələb edir. Ulduz oyunçunun vəkilləri psixoloji təzyiq və pis rəftar iddiaları qaldıraraq, müqaviləsinin ədalətsiz olaraq qeyri-müəyyən müddətə uzadıldığını, əmək haqqı və bonusların ödənilmədiyini iddia edirlər. Mbappenin kompensasiya iddiasına həmçinin 55 milyon avro ödənilməmiş debitor borcları da daxildir.

Məhkəmədə mübahisələndirilən ümumi kompensasiya 663 milyon avroya çatıb. Bu rəqəm futbol tarixində bir oyunçu ilə klub arasında ən böyük hüquqi mübarizə kimi tarixə düşməyə hazırlaşır. Məhkəmənin qərarı üçün hələlik konkret tarix açıqlanmayıb, lakin prosesin olduqca çətin olacağı gözlənilir.