Idman.biz
"Real Madrid"in hücumçusu Kilian Mbappe Fransa millisinin iki futbolçusu - Rayan Şerki və Dayot Upamekano barədə fikirlərini bölüşüb.
İdman.Biz xəbər verir ki, Mbappe gənc yarımmüdafiəçi Şerkinin istedadını xüsusi vurğulayıb.
"O, xüsusi istedaddır. Fitri və möhtəşəm bir bacarığı var, hazırda da bu potensialını inkişaf etdirmə prosesindədir. Fransa yığmasına və "Mançester Siti"yə çox yaxşı uyğunlaşıb, bu isə asan deyil. Ümid edirəm ki, eyni şəkildə davam edəcək", - deyə Mbappe bildirib.
Fransa millisinin kapitanı həmçinin Upamekano barədə danışaraq onun böyük klubda oynadığını və belə klubların çox olmadığını söyləyib.
"Mən yalnız bunu deyə bilərəm ki, belə oyunçudan danışanda, bütün klublar onu heyətinə qatmaq istəyir. O, bu mövsüm dünyanın ən yaxşı müdafiəçilərindən biri kimi müzakirə olunur", - deyə kapitan söyləyib.
