Idman.biz
"Liverpul"un və "Mançester Yunayted"in sabiq hücumçusu Maykl Ouen hücumçu Aleksandr İsak və müdafiəçi Mark Qehinin transfer kampaniyası zamanı davranışlarını müqayisə edib.
İdman.biz xatırladır ki, İsak "Nyukasl"dan "Liverpul"a keçib, Qehinin isə "qırmızılar"a keçməsinə "Kristal Pelas" yol verməyib.
"Hmm. Özünüzü pis aparın və istədiyiniz transferi əldə edəcəksiniz. Bir centlmen kimi davranın və həyatınızın fürsətini əldən verəcəksiniz. Nəticə belədirsə, oyunçuların gələcəkdə necə davranacağını proqnozlaşdırmağa ehtiyac yoxdur", - Ouen sosial şəbəkə hesabında yazıb.
Aleksandr İsak 2022-ci ilin yayından "Nyukasl"da çıxış edib. Ümumilikdə o, Premyer Liqada 86 matçda 54 qol vurub və 10 məhsuldar ötürmə edib. Xatırladaq ki, mətbuatda yayılan xəbərlərə görə, forvard rəhbərliyi onu "Liverpul"a buraxmağa məcbur etmək üçün "Nyukasl"ın məşqlərini boykot edib.
Qehi isə ötən mövsüm bütün turnirlərdə 44 oyuna çıxıb, 3 qol vurub və 2 məhsuldar ötürmə edib. Məlumatlara əsasən, müdafiəçinin "Liverpul"la müqaviləsinin təfərrüatlarını razılaşdırdığı halda, son anda "Kristal Pelas" fikrindən dönüb.
İdman.biz
