Idman.biz
"Liverpul"un sabiq hücumçusu Maykl Ouen Premyer Liqada mövsümə qeyri-sabit başlanğıca baxmayaraq, klubun gələcəyi ilə bağlı nikbin mövqe sərgiləyib.
İdman.Biz xəbər verir ki, Ouen yay transferlərinin komandaya uyğunlaşdıqca "Liverpul"un daha güclü təsir bağışlayacağını bildirib və heyətin keyfiyyəti ilə dərinliyinin uzun illər titul uğrunda mübarizə aparmağa imkan verdiyini vurğulayıb.
Onun sözlərinə görə, Avropada çətin səfərdən sonra qapını toxunulmaz saxlamaq və növbəti qələbəni qazanmaq bu kollektivin nə qədər güclü olduğunu göstərir. Ouen hesab edir ki, futbolçular maksimum səviyyədə oynadıqda "Liverpul" dünyanın ən yaxşı komandasıdır.
Sabiq hücumçu əlavə edib ki, komanda bunu hələ müntəzəm şəkildə nümayiş etdirməsə də, ötən mövsüm çempionluğu rahat qazanıb və gələcək üçün ciddi investisiyalar edib. Onun fikrincə, yeni transferlər zamanla öz sözünü deyəcək.
Maykl Ouen "Liverpul"un növbəti beş il ərzində də titul iddiaçılarından biri olacağını bildirib. O, komandanın oyun baxımından ideal səviyyədə çıxış etmədiyini qəbul etsə də, rəqiblərin hələ də "Liverpul"dan çəkinməli olduğunu qeyd edib. Sabiq futbolçu "Arsenal" və "Aston Villa" üzərində qazanılan qələbələri, eləcə də Çempionlar Liqasındakı uğurlu nəticələri buna nümunə göstərib.
Ouen sonda "fəlakət" ifadəsinin şişirdildiyini vurğulayıb və mövsümün hələ uzun olduğunu deyib.
