Idman.biz
Niderland millisinin və "Mançester Yunayted"in müdafiəçisi Matthiys de Liqtin şəxsi həyatında gözlənilməz anlar yaşanıb.
İdman.biz Niderland mətbuatına istinadən xəbər verir ki, futbolçu illər öncə "Ayaks"da oynadığı vaxt tanış olub ailə qurduğu Anneke ilə evliliyinə son qoyub.
Səbəb olduqca qeyri-adidir. Məlumata görə, de Liqt arvadının ezoterizmlə bağlı vəsvəsəsinə daha dözə bilməyib.
Annekenin hobbilərindən bezən futbolçu sonda bu addımı atmağa məcbur olub. Arvadı sosial şəbəkələrdə davamlı olaraq Taro kartları, astrologiya və enerjiyə dair mövzularda fotoşəkillər paylaşır, həmçinin "daxili axınlar" haqqında danışırmış.
Qeyd edək ki, ötən mövsüm 25 yaşlı niderlandlı futbolçu Premyer Liqada "Mançester Yunayted"in heyətində 29 matçda 2 qol vurub. Onun klubla müqaviləsinin müddəti 2029-cu ilin yayında başa çatacaq.
İdman.biz
