Masaki Murata: Son dəqiqələrdə oyuna daxil olan oyunçular xarakter göstərdilər

Misli Premyer Liqasının 13-cü turu çərçivəsində keçirilən "Şamaxı" – "Sumqayıt" matçından (1:2) sonra "Gənclik şəhəri" təmsilçisinin yaponiyalı yarımmüdafiəçisi Masaki Murata Sport24.az-ın suallarını cavablandırıb.

– Əvvəlcə oyunla bağlı fikirlərini bölüşərdin...
– Gördüyünüz kimi, ağır oyun idi. "Şamaxı" çox çətin rəqibdir, xüsusən də fərdi mübarizələrdə. "Qarabağ"a qarşı son oyunun ilk 20 dəqiqəsində yaxşı oynamamışdıq. Buna görə də bugünkü matçda ilk dəqiqələrdən yaxşı oynamağa çalışdıq. Uzaq yol, üstəgəl, süni meydança amili – bunlar oyunumuza təsirsiz ötüşmədi, çətinlik çəkdik. Ancaq sonda istəyimizə çatdıq və qələbə qazandıq. Buna görə xoşbəxtik. Komanda yoldaşlarımı təbrik edirəm.

– İkinci hissənin sonlarında nə baş verdi ki, bir neçə dəqiqə ərzində 2 qol vuraraq geridönüş etdiniz?
– Bu, komanda işidir. Son dəqiqələrdə oyuna daxil olan oyunçular xarakter göstərdilər. Bir komanda olaraq çalışdıq və meydanda sona qədər vuruşduq. Həm də Sumqayıtdan xeyli azarkeş bizi dəstəkləmək üçün Şamaxıya gəlmişdi. Onların dəstəyini hiss etdik və bu, bizə əlavə enerji, güc verdi. Buna görə də sona qədər oynaya bildik.

– Qarşıdan "Difai" ilə kubok matçı gəlir. Bu oyundan gözləntin nədir?
– Növbəti mərhələyə keçmək üçün bu da bizim üçün vacib oyundur. Açığı, rəqib haqda geniş məlumata malik deyiləm, amma oyun oyundur, fərqli bir şey yoxdur. Biz sadəcə öz oyunumuzu oynayıb qələbə qazanmalıyıq.