Idman.biz
İngiltərənin "Çelsi" klubunun sabiq baş məşqçisi Enzo Mareska müqaviləsinə vaxtından əvvəl xitam verildiyinə görə ona çatacaq 16,1 milyon avroluq (32 milyon AZN) kompensasiyadan imtina edib.
İdman.Biz "The Sun" nəşrinə istinadən xəbər verir ki, 45 yaşlı mütəxəssis klub rəhbərliyinin onun komandadakı nüfuzunu sarsıtdığını düşündüyü üçün kompensasiya məsələsini müzakirə etməyib.
Mareska 2029-cu ilə qədər nəzərdə tutulan və daha bir mövsüm uzadılma hüququ olan müqavilənin şərtlərinə baxmayaraq, bu mövzunu gündəmə gətirməyib.
Mənbə qeyd edir ki, məşqçinin ciddi narazılığına səbəb olan məqamlardan biri də onun guya futbolçuların sağlamlığını riskə atmağa və həkimlərin tövsiyələrinə baxmayaraq onları meydana buraxmağa hazır olması ilə bağlı irəli sürülən ittihamlar olub.
Bundan əlavə, Mareska ilə "Çelsi" rəhbərliyi arasında start heyəti və əvəzetmələr məsələsində də fikir ayrılıqları mövcud idi.
Xatırladaq ki, "Çelsi" Enzo Mareskanın vəzifəsindən azad olunduğunu yanvarın 1-də elan edib. İtaliyalı mütəxəssis London klubunu 2024-cü ilin yayından çalışdırırdı.
