Idman.biz
Argentina millisinin heyətində dünya çempionu olmuş Dieqo Maradonanın ölümü ilə bağlı işi araşdıran məhkəmə müdafiə tərəfinin iki hakimin işdən uzaqlaşdırılması ilə bağlı müraciətini rədd edib.
İdman.biz "L"Equipe" nəşrinə istinadən xəbər verir ki, Maradonanın şəxsi həkimi və hazırda istintaq altında olan Leopoldo Lukenin vəkilləri iyulda ilk məhkəmə prosesinin ləğvindən sonra yenidən formalaşdırılmış üç hakimli heyətin iki üzvünün kənarlaşdırılması üçün məhkəməyə müraciət ediblər.
Vəkillər həmin hakimlərin qərəzsiz olmayacağı ilə bağlı "müəyyən narahatlıqlara" istinad ediblər. Lakin hakimlər bu vəsatəti rədd edərək qeyd ediblər ki, bu tələb "hüquqi əsası olmayan, yalnız fərdi dəyərləndirmələrə, ehtimallara və fərziyyələrə əsaslanan və prosesi süni şəkildə uzatmağa yönəlmiş" bir cəhddir. Müdafiə tərəfi qərardan apellyasiya şikayəti verəcəyini açıqlayıb.
Qeyd edək ki, ilkin məhkəmə prosesi iki ay yarımlıq dinləmələrdən və üç hakimdən birinin bu proseslə bağlı sənədli serialın hazırlanmasında iştirak etməsi və orada baş rolda çıxış etməsi səbəbindən özünü prosesdən uzaqlaşdırmasından sonra mayın sonunda etibarsız hesab edilmişdi.
Maradonanın ölümü ilə bağlı 7 tibbi işçisinə - həkimlərə, psixiatr, psixoloq və tibb bacılarına qarşı "qəsdən adam öldürmə" ittihamı irəli sürülüb. Bu isə onların səhlənkarlığının ölümə səbəb ola biləcəyini bildikləri halda məsuliyyətsizlik göstərmələri kimi qiymətləndirilir. Onları 8 ildən 25 ilə qədər azadlıqdan məhrumetmə cəzası gözləyir.
Maradona 2020-ci il noyabrın 25-də 60 yaşında vəfat edib. Dünya çempionunun ölüm səbəbi ürək tutması olub. Ölümündən üç həftə əvvəl isə ona subdural hematomanın götürülməsi ilə bağlı beyin əməliyyatı aparılmışdı. 2025-ci ilin martından Argentina San-Isidro şəhərindəki cinayət məhkəməsində bu iş üzrə dinləmələr başlayıb.
İdman.biz
