Idman.biz
Portuqaliya millisinin sabiq futbolçusu, karyerası ərzində ölkəsində "Benfika", İngiltərədə "Everton", İspaniyada "Valensiya" və Türkiyədə "Beşiktaş" kimi tanınmış komandalarda çıxış etmiş Manuel Fernandeş həmyerlisi, eləcə də yığmadakı sabiq baş məşqçisi Fernandu Santuşun Azərbaycan millisindəki işi və özünün gələcək planları haqqında danışıb.
İdman.biz xəbər verir ki, veteran yarımmüdafiəçi AZƏRTAC-a açıqlamasında 70 yaşlı mütəxəssisə inandığını bildirib: "Düzünü desəm, Azərbaycan millisinin Fernandu Santuşun rəhbərliyi altında keçirdiyi oyunları izləməmişəm. Lakin o, Portuqaliya yığması ilə kuboklar qazanıb. Məhz Santuşun beynəlxalq arenadakı təcrübəsi Azərbaycan komandasına fayda verə bilər. Ümid edirəm ki, gələcəkdə uğurlu nəticələr olacaq".
39 yaşlı keçmiş oyunçu Avropa klublarında azərbaycanlı futbolçuların sayının az olmasına da toxunub: "Rəqabətədavamlı milli komanda formalaşdırmaq üçün oyunçuların legioner həyatı yaşaması çox önəmlidir. Güclü komandalarla və futbolçularla qarşılaşdığın zaman təcrübə qazanmış olursan. Bunun üçün daha çox futbolçu xarici liqalara üz tutmalıdır".
Fernandeş futbola qayıtmaq istəmədiyini vurğulayıb: "Məşqçi işləmək fikrim də yoxdur. Karyeram ərzində titullar əldə etmişəm. Bundan məmnunam. Hazırda ölkəmdə menecment üzrə universitet təhsili alıram. Bununla bağlı böyük planlarım var".
Qeyd edək ki, Manuel Fernandeş Portuqaliya millisinin heyətində 15 oyun keçirib və 3 qolla yadda qalıb. O, 2018-ci ildə Rusiyada təşkil edilən dünya çempionatının da iştirakçısı olub.
İdman.biz
