Idman.biz
İngiltərənin "Mançester Yunayted" futbol komandası Premyer Liqanın onuncu turunda "Aston Villa" ilə 4:4 hesablı heç-heçə edərək son dəqiqələrdə məğlubiyyətdən xilas olub.
İdman.Biz "The Independent" nəşrinə istinadən xəbər verir ki, "Old Trafford" stadionunda keçirilən qarşılaşma baş məşqçi Maykl KArrikin gələcəyi baxımından xüsusi əhəmiyyət daşıyıb.
Oyunun ilk dörd dəqiqəsində iki qol buraxan Mançester təmsilçisi fasiləyə qədər hesabı bərabərləşdirib. Lakin ikinci hissənin əvvəlində yenidən iki top fərqi ilə geri düşüb.
"Aston Villa"nın 4:2 hesabı ilə öndə olduğu qarşılaşmada meydan sahiblərinin əvəzetmədən meydana daxil olan futbolçuları dönüşün əsas qəhrəmanlarına çevriliblər.
Əsas vaxta əlavə olunan ikinci dəqiqədə Patrik Dorqunun ötürməsindən sonra Coşua Zirkzee fərqi minimuma endirib. 90+6-cı dəqiqədə isə Dorqu Bruno Fernandeşin künc zərbəsindən ötürməsini başla qapıya göndərərək hesabı bərabərləşdirib.
Qarşılaşmanın əvvəlində "Mançester Yunayted" azarkeşləri futbolçuların komandanın formasını geyinməyə layiq olmadıqlarını bildirən şüarlar səsləndiriblər. Lakin son dəqiqələrdəki möhtəşəm dönüşdən sonra tribunaların münasibəti dəyişib. Azarkeşlər komandanın baş məşqçisi Maykl Karrikin şərəfinə mahnılar oxuyublar.
"The Independent" yazır ki, bu mənzərə KArrikin gələcəyi ilə bağlı qeyri-müəyyənliyi daha da artırıb. Komanda ardıcıl ikinci oyunda iki top fərqi ilə geri düşdükdən sonra nəticəni dəyişməyi bacarıb.
"Mançester Yunayted" bir neçə gün əvvəl Çempionlar Liqasında İtaliyanın "Roma" komandasına qarşı da oxşar dönüş edərək 3:2 hesablı qələbə qazanıb.
Bununla belə, Mançester təmsilçisinin müdafiədəki problemləri davam edir. Komanda son beş qarşılaşmanın hamısında əvvəlcə iki qol fərqi ilə geri düşüb.
Nəşrin məlumatına görə, "Aston Villa" ilə oyunda buraxılan dörd qoldan sonra "Mançester Yunayted" cari mövsümdə bütün turnirlər üzrə Avropanın beş aparıcı liqasında ən çox qol buraxan komanda olub.
"Mançester Yunayted" son 11 oyunda cəmi bir qələbə qazanıb. Premyer Liqadakı son üç qarşılaşmadan isə yalnız bir xal toplayıb.
"Aston Villa" ilə heç-heçədən sonra komanda səkkiz xalla turnir cədvəlinin 18-ci pilləsində qalıb.
Nəşr vurğulayır ki, son dəqiqələrdəki dönüş KArrikə müəyyən dəstək qazandırsa da, komandanın uğursuz nəticələri və müdafiədəki ciddi problemləri onun vəzifədə qalmasını sual altında saxlayır.
