Idman.biz
"Mançester Yunayted" "Amazon"un klub haqqında sənədli film çəkmək təklifindən imtina edib.
İdman.biz xəbər verir ki, Mançester təmsilçisi ötən mövsümün ikinci yarısında bir neçə ay ərzində tanınmış televiziya şəbəkəsi ilə gizli danışıqlar aparıb.
"The Athletic"in məlumatına görə, çəkilişlərə 2025/26 mövsümündən başlamaq təklif olunub və film heyətinə komandanın daxilinə, demək olar ki, tam giriş hüququ verilməsi nəzərdə tutulub.
Mənbənin məlumatına görə, "Amazon" bu razılaşma üçün 10 milyon funt sterlinqdən çox vəsait təklif edib – bu, daha əvvəl "Arsenal", "Mançester Siti" və "Tottenhem"lə çəkilən "Hamısı və ya heç nə" sənədli serialları arasında rekord məbləğdir.
"Mançester Yunayted"in sahibləri, INEOS şirkəti, klubun kommersiya şöbəsi və baş direktor Omar Berrada sövdələşməyə razı olublar. Çünki "qırmızı şeytanlar"ın borcu 700 milyon funtdan çoxdur və klub ötən mövsüm Premyer Liqanı 15-ci pillədə tamamladığından Avropa turnirlərində iştirak etməyəcək.
Lakin yayın əvvəllərində "Amazon" ilə danışıqlar, əsasən, baş məşqçi Ruben Amorimin mövqeyinə görə dayandırılıb. O, çəkiliş heyətinin komanda mühitinə mümkün müdaxiləsindən narahat olduğunu bildirib və çəkilişlərin futbolçuları əsas işlərindən yayındıracağını vurğulayıb.
İdman.biz
