İdman.biz
"Şerif" elə bir komandadır ki, hər il fərqli şəkildə öz gücünü göstərir".
Bunu İdman.bizə "Qarabağ"ın sabiq futbolçusu Maksim Medvedev deyib.
O, Avropa Liqasının I təsnifat mərhələsi çərçivəsində "Zirə"nin "Şerif"lə səfər qarşılaşmasını şərh edib. Azərbaycan millisinin də formasını geyinmiş müdafiəçi bildirib ki, Tiraspol təmsilçisi ilə bağlı konkret bir söz demək çətindir: "Vaxtilə, bizimlə oynayanda "Şerif" çox yaxşı təsir bağışlayırdı. Sonradan qarşılaşanda isə tam fərqli bir komanda gördük. Hazırda moldovalıların durumunun nə yerdə olduğu bəlli deyil".
Medvedevin sözlərinə görə, "Zirə"nin son oyunlarına baxanda gücləndikləri də görünür: "Komanda "Şerif"lə oynamaq gücündədir. İstərdim, ilk oyunda "Zirə" qalib gəlsin ki, komandanın əhval-ruhiyyəsi yüksək olsun və cavab görüşündə də "Şerif"ə qarşı öz gücünü göstərə bilsin".
Qeyd edək ki, "Şerif" və "Zirə" arasında ilk görüş bu gün, saat 21:00-da "Şerif" İdman Kompleksində reallaşacaq. Cavab oyunu isə bir həftə sonra "Liv Bona Dea Arena"da keçiriləcək.
Aytac Sahəd
İdman.biz
