Maksim Medvedev: "Ümid edirəm ki, Kadi daha güclü qayıdıb və ona inanıram"

"Qarabağ"ın sabiq kapitanı Maksim Medvedevin İdman.biz-ə danışıb. Sport24.az həmin müsahibəni təqdim edir.

- Kadi Borgesin yenidən "Qarabağ"a qayıtmasını necə dəyərləndirirsiniz?

- Kadi "Qarabağ"ın bir parçasıdır. Vaxtilə birlikdə yaxşı nəticələr qazanmışıq. Onun qayıtmasının komandaya böyük təsiri olacaq. Kadini həm oyunçular, həm rəhbərlik, həm də məşqçilər heyəti yaxşı tanıyır. Hamısı bilir ki, o, nəyə qadirdir. Üstəlik, Kadinin adaptasiya üçün zamana ehtiyacı olmayacaq. Ola bilər ki, cəmi iki həftəyə bizim futbol stilimizə qayıtsın. Əsas odur ki, Kadi qısa zamanda tam performansını göstərə bilsin.

- Bundan öncə dəfələrlə bizim klublardan ayrılan futbolçuların geri döndükdə əvvəlki kimi yaxşı performans göstərmədiklərinin şahidi olmuşuq. Sizcə, eyni hal Kadi ilə də yaşana bilərmi?

- Özündən çox şey asılıdır. Dinamikasını göstərə bilsə, qısa zamanda nəticə verə biləcək. Ümid edirəm ki, Kadi daha güclü qayıdıb və ona inanıram. Biz bilirik ki, o nəyə qadirdir və rəqibləri nə dərəcədə təzyiq altında saxlaya bilir. Rəqiblər Kadidən çəkinirdi. Buna görə də, onun yenidən "Qarabağ"a qayıtması fikrimcə, komandaya çox böyük fayda verəcək.

- Kadi ilə "Qarabağ"dan gedəndən sonra əlaqə saxlayırdınız?

- Təbii ki, əlaqəni kəsməmişdik. Tez-tez mesajlaşır, telefonla danışırdıq. Kadi ilə münasibətimiz həmişə isti olub.

- AFFA-nın legioner limitinin ləğvi ilə bağlı verdiyi qərar son günlər futbol ictimaiyyətimizin əsas müzakirə mövzularındandır. Siz bu haqda nə düşünürsünüz?

- Həmişə demişəm ki, biz legionerləri kompleks şəkildə oyuna buraxırıq. Sırf 11 legioner oynayanda təbii ki, azərbaycanlı futbolçular üçün yaxşı olmayacaq. Çünki onlara yer az qalır. Ancaq bu strategiya ilk "beşlik"də olan komandalara sərf edir, çünki onların büdcəsi yaxşıdır. Hansı klubların ki, büdcəsi aşağıdır, onlar bu məsələdən dolayı sıxıntı yaşayacaqlar. Bir sözlə, qərarın həm yaxşı, həm də pis tərəfləri var.

- Siz özünüz də hazırda "Qarabağ"ın aşağı yaş qrupları üzrə komandasında işləyirsiniz. Bu sferada olan biri kimi sözügedən qərarın uşaq futboluna təsirini necə dəyərləndirirsiniz?

- Əlbəttə ki, bizə müəyyən qədər çətinlik yaradacaq. Çünki bu gün fəaliyyət göstərən futbol akademiyaları gələcəkdə Premyer Liqaya təxminən 100 uşaq verəcək. Həmin uşaqların harada oynaması sual altındadır. Əslində, bundan da çıxış yolu var. Ya xaricdə gedib oynayacaqlar, ya da komandalar artırılacaq ki, uşaqlar orada çıxış edə bilsinlər. Çünki hər klubdan 100 uşaq çıxanda görün bu nə qədər futbolçu edir. Axı onlar haradasa oynamalıdırlar. Tutaq ki, 20 faiz xaricə getdi, bəs qalanları? Bu, çox böyük rəqəmdir. Görünən odur ki, çoxu gedib I liqada oynayacaq, ən yaxşıları isə Premyer Liqaya qalxacaq. Hazırki qərarlar gedişatı bu yöndə aparır. İstənilən halda, bu strategiya üzərində xeyli işləmək lazımdır.