Report.az
"Qarabağ"ın sabiq futbolçusu Maksim Medvedev UEFA Çempionlar Liqasının yarımfinal matçları və final görüşü ilə bağlı fikirlərini bölüşüb.
O, bu barədə "Report"a açıqlama verib.
M.Medvedev "İnter"in (İtaliya) "Barselona"ya (İspaniya) qarşı çox yaxşı hazırlıq gördüyünü deyib:
"İnter"lə "Barselona" arasında keçirilən ilk oyundan əvvəl çox insan düşünürdü ki, İspaniya klubu mərhələ adlayacaq. Amma oyun göstərdi ki, bu heç də asan olmayacaq. "İnter" rəqibi çox yaxşı təhlil etdi və oyuna hazırlaşdı. Həm də oyun baxımından geridə qalmırdı. "Barselona"da fərdi şəkildə güclü olan futbolçular var. Amma "İnter" kollektiv şəkildə, həm hücumda, həm də müdafiədə çox gözəl oyun göstərdi. Komanda hərtərəfli şəkildə hazır idi. Bu səbəbdən rəqibini üstələyə bildi. İkinci görüş də çox maraqlı alındı. Belə oyunlar təhlillər aparmaq üçün böyük materialdır".
Sabiq müdafiəçi PSJ (Fransa) və "Arsenal" (İngiltərə) arasında keçirilən digər yarımfinal matçına da toxunub:
"Fransa klubu müəyyən mənada üstün futbol sərgilədi. "Arsenal" kollektiv oyuna baxmayaraq, istədiyinə nail ola bilmədi. PSJ-nin heyətində də fərdi olaraq yaxşı, nəticə verə biləcək futbolçular var. Həm sürət, həm də komanda şəklində bir-birilərini tamamlayırdılar. Düşünürəm ki, bu səbəbdən "Arsenal"ı keçə bildilər".
Azərbaycan yığmasının sabiq kapitanı PSJ və "İnter" arasında baş tutacaq final matçının maraqlı olacağını gözləyir:
"PSJ ilə "İnter" arasında çox maraqlı final olacaq. Bəlkə də belə finalı çoxları gözləmirdi. "İnter" "Barselona"ya qarşı sərgilədiyi futbolu davam etdirsə, PSJ üçün çətin olacaq. Çünki əks-hücumlara, açıq futbola üstünlük verən komandadır. Fikrimcə, kollektiv oyun göstərən "İnter" UEFA Çempionlar Liqasının qalibi olmağa daha yaxındır. PSJ-nin futbolçuları fərdi şəkildə nəslərsə edərsə, "İnter"in qapısından qol keçirə bilərlər. Hamımız finalı səbirsizliklə gözləyirik. Mən öz fikirlərimi bildirdim, amma komandalar oyuna nə dərəcədə hazır olacaq - bunu zaman göstərəcək. Hər iki komandaya uğurlar arzulayıram. Çempion olmağa layiqdirlər".
Qeyd edək ki, UEFA Çempionlar Liqasının yarımfinalında iki oyunun nəticəsinə görə "İnter" "Barselona"nı (3:3, 4:3), PSJ isə "Arsenal"ı (1:0, 2:1) məğlub edərək finala yüksəlib. PSJ və "İnter" arasında həlledici qarşılaşma mayın 31-də Almaniyanın Münhen şəhərində baş tutacaq.
