Sport24.az
Azərbaycan millisinin futbolçusu Mahir Emreli Almaniyanın "Kayzerslautern" klubunda heyətə düşməkdə çətinlik çəkir. Sport24.az xəbər verir ki, ölkənin məşhur "Bild" nəşri II Bundesliqa təmsilçisi ilə 28 yaşlı hücumçu arasında yaşananlarla bağlı yeni yazı dərc edib.
Forvardın hələ də baş məşqçinin etimadını qazana bilmədiyi vurğulanıb:
"Azərbaycanlı oyunçu cəmi üç matçda meydana çıxıb. O, sonuncu dəfə avqustun 22-də, "Elversberq"lə görüşdə iştirak edib. Emreli o vaxtdan bəri heyətə daxil edilmir. Hətta futbolçunun millinin toplanışından qayıdandan sonra etdiyi paylaşım klub rəhbərliyinin də xoşuna gəlməyib. Mahir onun üçün çətin zaman olduğunu və hər şeyin istədiyi kimi getmədiyini yazıb. O, özündən asılı olmayan səbəblərdən oynamadığını vurğulayıb".
Baş məşqçi Torsten Liberknextin də bu paylaşımı bəyənməyib. Hətta "Bild" nəşri Emrelinin ötən mövsüm "Nürnberq"də çıxış etdiyi dönəmdə bir sıra problemlər yaratdığını diqqətə çatdırıb.
Qeyd edək ki, "Kayzerslautern" oktyabrın 26-da II Bundesliqada "Nürnberq"lə üz-üzə gələcək. Mahir Emreli səhhətindəki problem səbəbindən komandanın son məşqinə qatılmayıb.
