Mahir Emreli vida paylaşımında bunları qeyd edib: "Bu formanı yalnız bədənimdə deyil, həm də ürəyimdə fəxrlə daşımışam" - ŞƏKİL

Futbol üzrə Azərbaycan yığmasının futbolçusu Mahir Emreli Almaniyanın "Nürnberq" klubu ilə vidalaşıb.

İdman.biz xəbər verir ki, o, instaqram sosial şəbəkəsi hesabında alman dilində vida paylaşımı edib.

28 yaşlı hücumçu paylaşımda bunları yazıb: "Hər bir futbolçunun karyerasında elə klubları var ki, onlar səyahətin bir hissəsinə çevrilmir, onlar sizin özünüzün bir hissəsinə çevrilirlər. Mənim üçün "Nürnberq" məhz belə bir klubdur.

Azərbaycanlı futbolçu üçün Avropanın ən tarixi klublarından birində oynamaq xüsusi qürur hissidir. Amma ən dəyərlisi təkcə meydanda oynamaq deyildi, Miroslav Kloze kimi futbol əfsanəsi ilə işləmək imkanı idi. Uşaqlıq arzumun gerçəkləşdiyi an idi.

Hörmətli "Nürnberq" ailəsi, siz mənə güvəndiniz, mən isə hər dəfə bu formanı geyinəndə, vurduğum hər qolda, döyüşdüyüm hər oyunda sizi qürurlandırmağa çalışdım. Bu formanı təkcə bədənimdə deyil, ürəyimdə qürurla geyinmişəm. Çünki arxamda sizin kimi əziz azarkeşlərim var idi.

Bu gün "Nürnberq"dən ayrılıram, amma fonda hələ də sizin səslərinizi, alqışlarınızı və bu şəhərin ürək döyüntülərini eşidirəm. Və ürəyimdə heç vaxt unuda bilməyəcəyim bir sevgi daşıyıram...".

Emreli vida mesajını klubun şüarı olan "Einmal Cluberer, immer Cluberer!" ("Bir dəfə klubda oldunsa, daimi klubdasan" sözləri ilə bitirib.

Qeyd edək ki, Mahir 2-ci Bundesliqada başa çatmış mövsümdə 24 oyun və 10 qolla yadda qalıb.

İdman.biz