Mahir Emreli: "Yayadək dözüb qərarımızı verəcəyik"

"Kifayət qədər qol epizodu yaratdıq".  Sport24.az xəbər verir ki, bu sözləri Azərbaycan millisinin futbolçusu Mahir Emreli deyib. 

27 yaşlı hücumçu ötən gün Haitiyə uduzduqları (0:3) yoldaşlıq oyunundan sonra fləş müsahibəsində fikirlərini bölüşüb:

"100 faizlik şanslarımız da oldu. Dəyərləndirə bilərdik. Amma bu, futboldur. Belə hallar olur. Erkən buraxdığımız qol planlarımızı pozdu. Həftə ərzində rəqibi analiz etmişdik. Komanda şəklində oynamağı planlaşdırırdıq. Amma qapımızda top görməyimiz planlarımızı pozdu. Belə olan halda istər-istəməz irəli çıxdıq, evdə oynadığımız üçün rəqibə təzyiq göstərmək istədik. Arxada boşluqlar verdik və fərqlənə biləcəyimiz anda qol buraxdıq. Yoldaşlıq matçı olduğunu anlamalıyıq. Baş məşqçimiz də bəzi yeni metodlar yoxlayırdı. Heyətdə meydana çıxan yeni futbolçular oldu. Gənclər üçün yeni təcrübə idi. Çoxusu əlindən gələni etdi. Ramazan ayında oynayırıq. Oyunçular oruc tutmalarına baxmayaraq maksimumlarını verə bilirlər. Səhvlərimizi analiz etməli və Belarusla görüşə doğru şəkildə hazırlaşmalıyıq. Meydana qələbə üçün çıxmalıyıq". 

Emreli əvəzlənərkən baş məşqçi Fernandu Santuşla söhbət etməsi barədə danışıb: "Yaxşı oynadığımı dedi. Özümü harada daha yaxşı hiss etməyimlə bağlı qısa danışımız oldu". 

O, Almaniyanın "Nürnberq" klubundakı durumundan da söz açıb: "Bu barədə yəqin ki, bir gün açıqlama verəcəyəm. Yəqin ki, yayda olacaq. Sadəcə, bunu deyə bilərəm ki, söylənənlərin çoxu həqiqəti əks etdirmir. Klubumda hər şey normaldır. Deyilən kimi deyil. Futbolla bağlı problem deyil. Tamam başqa məsələ idi. Bu da normaldır. Futbol bir az biznesə də çevrilib. Sadəcə, sakitliyimi qoruyacağam və yaya kimi dözəcəyəm. Ondan sonra qərarımızı verəcəyik".