Mahir Emreli: "Bunu etməlisən, əks halda evdə problemlərin olacaq"

Millimizin hücumçusu Mahir Emreli şərəfini qoruduğu "Nürnberq"ın yutub kanalına müsahibə verib. Sport24.az Qol.az-a istinadən həmin müsahibəni təqim edir.

- Bu gün məşqdə əhval-ruhiyyə necə idi?

- Bu gün oyun kimi sərin idi, yoqa masajı və velosiped sürmək kimi əsas işləri görürük. Saunaya gedirik. Cümə günü keçiriləcək oyuna hazır olmağa çalışırıq.

- Son oyunun ("Düsseldorf"la matç (2:2) nəzərdə tutulur - red.) nəticəsindən nə qədər məyussunuz?

- Son dəqiqə qolları ilə üzülmək təbii ki, pisdir. Ardıcıl iki oyunda belə oldu. Əslində biz bu oyunlarda daha yaxşı oynayırdıq. Deməli, daha çox işləməli və yaxşı nəticələr qazanmalıyıq. Oyuna hakim olmaq gözəldir. Amma nəticəyə də diqqət yetirməliyik. Ümid edirəm ki, növbəti oyunlarda yaxşı nəticələr qazanacağıq. 

- Növbəti turda səfərdə "Elversberq"lə qarşılaşacaqsınız. Bu oyundan nə gözləyirsiniz?  Fərqli atmosferdə oynayacaqsınız.

- Bizim liqamızda evdə oynayan komandalar daha çox hücumda olurlar. Çünki azarkeşlər yaxşı dəstək verir.  Bizim azarkeşlər səfərdə də bizi tək qoymurlar. Tərəfdarlarımız hara getməyimizdən asılı olmayaraq, bizə dəstək olur, şou göstərirlər. Bəzən özümüzü səfərdəki kimi hiss etmirik. Əlbəttə ki, rəqibi təhlil edəcəyik, amma indi onlar haqqında çox şey deyə bilmərəm. Ümid edirəm ki, rəqibi tam öyrənəcəyik və cümə gününə qədər hazır olacağıq.

- Klubun sosial şəbəkə hesablarında azərbaycanlıların çoxluq təşkil etməsinə münasibətin necədir?

- Burada pis şey görmürəm. Almaniyada ölkəmizi təmsil edirik. Buna görə hər atdığımız addım önəmlidir. Həmişə ölkədən kənarda oynamaq, dünyaya bizim futbolçuları göstərmək, oyunçularımız üçün qapı açmaq arzum idi. Düşünürəm ki, ölkəmdəkilərin də mənə böyük ümidləri var. Onları məyus etməmək üçün əlimdən gələni etməyə çalışıram.

- Normalda bizim müsahibədə ilk sual komanda yoldaşlarından olur, amma bu gün səhnə anana verildi. O, bilmək istəyir Almaniyada 5-ci qolu nə vaxt vuracaqsan?

 - (Gülür) Mən anamla həmişə bu barədə söhbət edirəm. Amma deyəsən o, indi bunu mənim dilimdən rəsmi olaraq eşitmək istəyir. Mən nəticələr və 3 xalla daha çox maraqlanıram. Bu, ən vacib şeydir, amma əgər anam bunu gözləsə, ümid edirəm ki, 5-ci və 6-cı qol olacaq. Mənim ölkəmdə bunu etməlisən, əks halda evdə problemlərin olacaq. Buna görə ümid edirəm ki, hər şeyi edə bilərəm.

- Qol sevinci zamanı komanda yoldaşın Stefanos Tsimasla birlikdə Kriştiano Ronaldonun hərəkətini təkrarladın...

- Ronaldo ən böyük oyunçulardan biridir. Amma mən onun fanatı deyiləm. Stefanos onun azarkeşidir.