Idman.biz
"Mən projektor işıqları altında oynamağı sevirəm".
İdman.biz xəbər verir ki, bu sözləri "Kayzerslautern"in hücumçusu Mahir Emreli Almaniyanın "Bild" nəşrinə açıqlamasında bildirib.
O, özünün və hücumdakı oyundaşları İvan Prtayin və Daniel Hanslikin qol vurmağı hamıdan çox istədiklərini deyib: "Amma kimin qol vurduğunun fərqi yoxdur, əsas odur ki, biz üç xal qazanaq."
Emreli anlayır ki, "Hannover"ə ilə oyundakı 0:1 hesablı məğlubiyyətdən sonra hücum xətti tənqid edilib, amma o buna sakit yanaşır:
"Təbii ki, hücum nəticə verməyəndə insanlar narazı qalır. Qol vurduqda isə daha da sevinirlər. Bu günlərdə insanlar daha çox statistikaya baxırlar, nəinki gözəl oyunlara. Bu səbəbdən tənqidi anlayıram – bu, futbolçu həyatının bir hissəsidir".
Koordinasiya hələ də istənilən səviyyədə deyil. Hücum xəttində qarşılıqlı anlaşma? Onu yaxşılaşdırmaq mümkündürmü? "Kayzerslautern"in yeni transferi bunu belə izah edir: "Düşünürəm ki, mənimlə İvanın hələ zamana ehtiyacı var. Bu qədər qısa müddətdə oyunumuz ideal ola bilməz. Bir neçə matçdan sonra hər şey xeyli yaxşılaşacaq".
Emreliyə güc verən nədir? O, komanda ruhu, qələbə istəyi, atmosferi qeyd edir: "Keçən mövsüm Kayzerslauterndəki inanılmaz oyundan çox adama danışmışam. Atmosfer fantastik idi, stadionun memarlığı isə təsiredicidir. Mən bir çox böyük stadionlarda oynamışam, amma bu arena xüsusidir".
Apreldə o, keçmiş komandası "Nürnberq"lə burada 2:1 hesabı ilə qalib gəlmiş və hətta qol da vurmuşdu.
Azərbaycan millisinin 28 yaşlı futbolçusu "Kayzerslautern"in yeni mövsümdə evdə ilk oyunu öncəsi ümidli danışır: "Ümid edirəm ki, bu ilk ev oyunu uğurlu bir başlanğıc olacaq".
Komandası səfərdə "Hannover" kimi güclü rəqibə qarşı çempionatın ilk oyununda məğlub olsa da, Emreli "qırmızı şeytanlar"la uğurlu mövsümə hələ də inanır: "Komandada çoxlu istedadlı və peşəkar futbolçular var. Məncə, biz ilk "üçlük" uğrunda mübarizə aparacaq potensiala sahibik — bu, mənim şəxsi fikrimdir. Özümüzə eyni dərəcədə inamlı olmalıyıq".
Qeyd edək ki, "Kayzerslautern" II Bundesliqanın 2-ci turu çərçivəsində avqustun 9-da evdə iddialı "Şalke" ilə qarşılaşacaq. Oyun Bakı vaxtilə saat 22:30-da başlayacaq.
İdman.biz
