Idman.biz
Mahir Emrelinin komandası "Kayzerslautern" II Bundesliqanın 2-ci turu çərçivəsində bu gün evdə "Şalke"ni qəbul edəcək.
İdman.biz xəbər verir ki, meydan sahibləri mövsümə səfərdə "Hannover"ə 0:1 məğlub olmaqla, qonaqlar isə evdə "Herta"ya 2:1 hesabı ilə qalib gəlməklə başlayıblar.
Mətbuatın yazdığına görə, çərşənbə günü açıq məşqdə "Kayzerslautern" azarkeşləri Torsten Liberknextin çalışdırdığı komandasının azarkeşlərin tam dəstəyinə arxalana biləcəyini nümayiş etdiriblər. Səhər məşqini təxminən 1000 azarkeş izləyib və mövsümün ilk ev oyunu üçün həyəcan aydın hiss olunub.
Baş məşqçi də 50 minə yaxın tamaşaçı tutan "Fritz-Walter-Stadion"dakı oyunu səbirsizliklə gözləyir: "Azarkeşlərimizin dəstəyi sayəsində hücum potensialımızı fərqli şəkildə göstərə bilərik".
Rəqib "Şalke" 2024/25 mövsümündə II Bundesliqada 14-cü yeri tutub ki, bu da klub tarixində ən zəif nəticə olub. Qonaqların kapitanı Kenan Karaman zədəsini sağaldaraq heyətə qayıdıb və oyuna çıxacağı gözlənilir. 31 yaşlı hücumçu 2017-2021-ci illərdə Türkiyə millisində 31 oyunda 6 qol vurub, həmçinin bir müddət "Beşiktaş"ın formasını geyinib.
"Şalke"nin digər tanınmış futbolçusu Amin Younes 2014/15 mövsümündə icarə əsasında "Kayzerslautern"də çıxış edib. 32 yaşlı yarımmüdafiəçi 2017-2021-ci illərdə Almaniya millisində 8 oyunda 2 qol vurub.
Rəqiblərin son üç qarşılaşmasında "Kayzerslautern"in qələbə qazanması diqqəti çəkir. Ümumi statistika isə demək olar ki, bərabərdir: "Şalke" 34 dəfə qalib gəlib, 33 dəfə məğlub olub, 25 görüş də heç-heçə başa çatıb.
"Kayzerslautern"in "Şalke" ilə oyuna ötən həftəsonu meydana çıxan eyni heyətlə başlayacağı gözlənilir. O səbəbdən Azərbaycan millisinin forvardı Mahir Emreli də ilk 11-likdə yer alacaq və yeni mövsümdə qol hesabını açmağa çalışacaq.
Qeyd edək ki, "Kayzerslautern" - "Şalke" matçı Bakı vaxtilə saat 22:30-da başlayacaq.
İdman.biz
