Mahir Emrəli: “Əgər anam bu qolu gözləyirsə, vuraram"

"İşin gülməli tərəfi burasıdır ki, hər zaman anamla bu barədə danışırdıq, amma indi deyəsən rəsmi açıqlama istəyir. Hər zaman mən nəticəyə və üç xalı əldə etməyə daha çox önəm verirəm, bu mənim üçün ən vacibdir".

İdman.biz xəbər verir ki, bunu Azərbaycan millisinin və Almaniyanın II Bundesliqasında çıxış edən "Nürnberq" klubunun futbolçusu Mahir Emreli klubun yutub kanalına açıqlamasında deyib.

Anasının ona ünvanlandığı suala Emrelinin cavabı maraqlı olub: "Əgər anam bu qolu gözləyirsə, ümid edirəm ki, "Elversberq" qarşısında beşinci və ya altıncı qolu vuraram, bilmirəm. Əgər mənim ölkəmdə anan sənə bir şey tapşırıbsa, bunu dərhal etməlisən. Çünki əks halda evdə problemlər yaşayarsan. Ümid edirəm ki, bunu edə biləcəm".

Futbolçumuz "Nürnberq"dəki məşqlərindən də bəhs edib: "Bu gün çox rahat idi, oyun bitdikdən sonra əsasən yoqaya və masaja vaxt ayırdıq, velosiped sürdük və sonra saunada dincəldik. Cümə günü oyunumuz var və əlimizdən gəldiyi qədər sürətli toparlanmağa çalışdıq".

Mahir klubdakı mövcud durumdan da danışıb. Bildirib ki, artıq iki oyundur ki, ard-arda son dəqiqələrdə qol buraxırlar: "Məni ən çox məyus edən şey əvvəlcə üstünlüyün bizdə olması və rəqibdən daha yaxşı oynamağımızdır. Biz həmişə deyirik ki, biz daha yaxşı oynadıq, amma nəticə yoxdursa, bunun heç bir mənası da qalmır. Əlbəttə ki, oyunda üstünlüyü əldə etmək yaxşıdır, lakin nəticəyə də diqqət yetirməliyik. Ümid edirəm ki, gələcək oyunlarda yaxşı oynayacağıq və yaxşı nəticələr alacağıq".

Emreli "Elversberq"la keçirəcəkləri növbəti qarşılaşma barədə də danışıb: "Bizim liqada ev sahibi komandaların ən böyük üstünlüyü azarkeşlərdir. Bu, bizim üçün üstünlükdür, əks-hücumda önə keçmək fürsətidir. Hələ rəqiblə bağlı çox məlumatımız yoxdur, amma sabahdan artıq təhlil etməyə başlayacağıq və ümid edirəm ki, ən yaxşısını edəcəyik. Təbii ki, yaxşı stadionda oynamaq daha çox motivasiya verir".

Həmyerlimiz azarkeş dəsəyi barədə də fikirlərini açıqlayıb. O bildirb ki, harada oynamaqlarının fərqi yoxdur, çünki azarkeşlər hər yerdə yaxşı dəstək verirlər.

Mahir Əmrəli vurğulayıb ki, onun üçün hər şey öz ölkəsini təmsil etməkdir: "Bu, mənim üçün həmişə bir arzu olub, çünki mənim məqsədim həm ölkəmə, həm də futboluma qatqı verməkdir".

İdman.biz