Idman.biz
"İmişli" son vaxtlar çətin matçlar keçirir, bu liqada asan oyun yoxdur".
Bunu "Kəpəz"in braziliyalı hücumçusu Luis Paçu futbolinfo.az-a müsahibəsində deyib.
Həmin müsahibəni təqdim edirik:
– Premyer Liqanın 8-ci turunda "Şamaxı"nı 4:1 hesablı məğlubiyyət uğratdınız. Oyundan əvvəl bu qələbəni gözləyirdiniz?
– Komandadan çox yaxşı çıxış gördük, hər kəs böyük xarakter göstərdi. Geri düşməyimizə baxmayaraq, sona qədər mübarizə apardıq və qalib gəldik. Bu qələbə bizim üçün çox vacib idi.
– Bu, mövsümdə ilk qələbənizdir. Sizcə, uğurlu gedişatı davam etdirə biləcəksinizmi?
– Ən çox istədiyimiz şey qələbələrdir. Növbəti oyunda da əlimizdən gələni edəcəyik və daha 3 xal üçün oynayacağıq.
– Bu qələbə sizə növbəti oyunlar üçün motivasiya verəcəkmi?
– Əlbəttə. Bu qələbə bizə növbəti oyunlar üçün inam qazandırır.
– Sizcə, son pillədən uzaqlaşa biləcəksiniz?
– Bunun üçün belə işləməyə davam etməliyik. Qarşımızda hələ çox oyun var, amma ciddi çalışmaq və təvazökar qalmaq lazımdır.
– Növbəti oyun "İmişli"yə qarşı olacaq. Rəqibə qalib gəlməyə hazırsınızmı?
– Böyük oyun olacaq. "İmişli" son vaxtlar çətin matçlar keçirir, bu liqada asan oyun yoxdur. Amma bir həftə ərzində hazırlaşacağıq və növbəti 3 xal üçün meydana çıxacağıq.
